Անչափահասներու կողմէ գործադրուած յանցանքները հետզհետէ աւելի մտահոգիչ համեմատութիւններու հասած են։ Բացի փողոցային որոշ յարձակումներու համար անչափահասներէ օգտուելու եւ անոնք շահագործելու հակումէն, ուղղակի պատանի տարիքի երիտասարդներու հեղինակած յանցագործութիւններն ալ օրակարգի գլխաւոր նիւթերը դարձած են։
Երկու դէպքեր, մէկը՝ Ուրֆայի Սիվերեք գաւառի մէջ 14 Ապրիլ երեքշաբթի, իսկ երկրորդը Մարաշի մէջ 15 Ապրիլ չորեքշաբթի օր սահմռկեցուցիչ տեսարանը պարզեցին ամբողջ երկրի օրակարգին։
Առաջին դէպքին մէջ ուսանողը որսի հրացանով մտաւ դպրոց, աջ ու ձախ կրակեց, կարգ մը աշակերտները պատանդ վերցուց 16 աշակերտի վիրաւորուելուն պատճառ դարձաւ եւ ապա անձնասպան եղաւ դէպքի վայրը։
Յաջորդ յարձակումը աւելի ծանր հետեւանքներ ունեցաւ, քանի որ այս անգամ 8 աշակերտ եւ մէկ ուսուցիչ զոհուեցան ու 13 անձեր ալ վիրաւորուեցան, որոնց մէկ մասի կեանքը վտանգուած է։ Յարձակող պատանին ինք եւս մահացած է։
Առաջին հարցաքննութիւններու աւարտին յայտնի դարձաւ որ յարձակումը իրականացնող պատանիի հայրը Անվտանգութեան նախկին ծառայող մը եղած է եւ յարձակումը կատարուած է իրեն պատկանող հինգ ատրճանակներով։
Յիշողութիւններու մէջ դեռ շատ թարմ է Մարտ ամսու սկզբին Իսթանպուլի մէջ պատահած դէպքը, ուր 17 ամեայ աշակերտը դաշունահարած էր իր ուսուցիչը եւ մահուան պատճառ դարձած։
Ուսուցիչներու Էղիթիմ Սեն Արհմիութիւնը Ուրֆայի յարձակումէն ետք յաջորդ օրուայ համար գործադուլի կոչ ըրաւ եւ ուսուցիչները հրաւիրեց Կրթութեան Նախարարութեան մուտքին, բողոքելու համար դպրոցներէ ներս տիրող անկարգութիւնները։ Արհմիութեան մամլոյ յայտարարութեան մէջ կը նշուի թէ անհրաժեշտութիւն դարձած է դպրոցներու ապահովութիւնը, որուն համար առաջին կարգի պարտական է Կրթութեան նախարարը։
Երբ պետական դպրոցներ դպրոցի շէնքի ամենաէական մաքրութիւնը եւ խնամքը ապահովելու միջոցներէ զուրկ են, շատ ալ արձագանգ պիտի չգտնէ ուսուցիչներու արհմիութիւններու այս բնոյթի կոչերը։
Մէկ կողմէն յանցագործ աշխարհի պահանջած մարդուժը, միւս կողմէ ամբողջ երկիրը իր ազդեցութեան տակ պահող համատարած աղքատութիւնը եւ գործազրկութիւնը բնական գետին մը կը պատրաստեն ապագայի հանդէպ յոյսերը սպառած երիտասարդներու համար։ Անոնք դիւրաւ կը շեղին օրինական վարքէ եւ կը տարուին յանցագործ աշխարհի առաջարկած շլացուցիչ հրապոյրէն։
