Հայ համայնքէ ներս աղքատութիւն

Երկրի մատնուած տնտեսական ճգնաժամը իր բնական արտացոլումը կ՚ունենայ նաեւ Թուրքիոյ հայ համայնքի անդամներուն վրայ եւս։ Պատրիարքարանի ընկերային օգնութեան յանձնախումբը, եկեղեցիներու աղքատախնամ մարմինները, Մեր Հայեր Միութիւնը աղքատութեան դէմ պայքարելու համար զանազան միջոցներու կը դիմեն։

Երբ նիւթը կը վերաբերի աղքատութեան, առաջին հերթին մտաբերուածը սննդամթերքի աջակցութիւնն է։ Սակայն անդին կայ՝ բնակման, առողջութեան տարրական վճարումներու կամ յուղարկաւորութեան ծախսերը, որոնց մասին յիշող իսկ չկայ։

Ներկայ պայմաններու մէջ հայ համայնքի անհատի մը թաղումը նուազագոյն 100 հազար Լիրայի կը կարօտի։ Տիրող աղքատութեան օրերուն շատերու համար դժուար դիմագրաւելիք գումար մըն է այս։ Արդարեւ Պատրիարքարանի վիճակագրութիւններն ալ կ՚ապացուցեն այս դժուարութիւնը, տրուած ըլլալով թէ 2024-ին կատարուած 68 ձրի յուղարկաւորութեան փոխարէն 2025-ին այս թիւը բարձրացած է 78-ի։