Ժողովրդահանրապետական կուսակցութեան Իսթանպուլի քաղաքապետական ընտրութիւններուն մէջ արձանագրած յաղթանակին կարեւոր դերակատարներէն մէկն է, այդ կուսակցութեան Իսթանպուլի նախագահ՝ Ճանան Քաֆթանճըօղլու։
Իր այս պաշտօնը ստանձնելէն մէկուկէս տարի վերջ Ժողովրդահանրապետական կուսակցութիւնը յաջողեցաւ Ճանան Քաֆթանճըօղլուի վարած ընտրարշաւի արդիւնքով նուաճել Իսթանպուլի քաղաքապետութեան խիստ կարեւոր դիրքը։ Կուսակցութիւնը այսպէսով 25 տարուայ ընդհատումէ ետք վերատիրացաւ Իսթանպուլի քաղաքապետութեան։ Այս առթիւ զրուցեցինք Ճանան Քաֆթանճըօղլուի հետ նիւթ ունենալով, թէ 23 Յունիսի ընտրութիւնները, եւ թէ կուսակցութեան ապագայի մասին հեռանկարները։
ՖԵՐՏԱ ՊԱԼԱՆՃԱՐ
ferda@agos.com.tr
Բազմաթիւ դիտորդներ ընտրութեան յաջողելուն մէջ կը մատնանշեն կազմակերպչութեան կարեւորութիւնը։ Դուք ալ յաճախ ակնարկած էք խարիսխէն բարձրացող կազմակերպուածութեան մը կարեւորութեան մասին։ Ուրեմն զրոյցին սկսին այս երեւոյթով։
Իրականութեան մէջ ձեր մատնանշածը նորարարութիւն մը չէ։ Ես Իսթանպուլի նահանգային վարչութեան թեկնածութիւնս առաջարկած պահուն խոստացած էի, որ յետ այսու կազմակերպութիւն մը պիտի դառնանք։ Այս ըսելով շեշտել կ՚ուզէի թէ գործը պիտի գերակշռէ խոստումներու դիմաց։ Արդարեւ անցնող 18 ամիսներու ընթացքին մեր աշխատանքները շարունակեցինք այս սկզբունքի հիման վրայ։ Իրականութեան մէջ մեր ըրածները նախապէս ալ որդեգրուած, բայց չիրականացածները կեանքի կոչել էր։ Ըստ ինծի յաղթանակը կապուած է, ճիշդ ալ այս կազմակերպուածութեան վրայ։ Դարձեալ իմ ընտրուած համագումարի ընթացքին խոստացած էի ըսելով որ իշխանութեան այս քաղաքէն եկան եւ այս քաղաքէն ալ պիտի երթան։ Այսօր իմ գործընկերները յաճախ կը յիշեցնեն իմ այդ օրերու ելոյթները, որոնք մի առ մի իրականացան։ Ճիշդ է ես ըսած էի, բայց ուրախ եմ որ իմ գործընկերներն ալ բաժնեցին այդ միտքերը եւ գործեցին համապատասխան եռանդով։ Մենք այսպէսով նաեւ յաջողեցանք մէկտեղել իրարմէ անջատ ընթացող զանազան գործերը։
Օրինակով մը կրնա՞ք յիշել։
Սիրով կը յիշեմ, բայց չեմ ուզեր, որ իմ այս խօսքերը նախորդ շրջանի համար բողոք կամ քննադատութիւն ըլլալով ընկալուին։ Օրինակի համար մեր բոլոր շարքայինները կը բաժնէին «Պէտք է շատ աշխատինք» կարգախօսը, բայց առհասարակ չէին աշխատեր։ Իսկ ներկայիս, երբ կ՚ըսեմ ժամը 06.00-ին սնտուկներու մօտ գտնուինք, ես արդէն հոն գացած կ՚ըլլայի 05.00-ին։ Երբ կազմակերպութեան կ՚ըսէի։ Գոհացէք չորս ժամուայ քունով, ես երբեք 3,5 ժամէ աւելի չէի քներ։
Քաղաքի վարիչ ընտրուելէ ետք շրջանային վարիչները ժողովի հրաւիրեցի առաւօտուայ եօթին։ Բոլորին համար խիստ անսովոր ժամ մըն էր այդ եւ իրենցմէ շատեր կը կարծէին թէ այդ ժողովով իրենց հրաժարումը պիտի պահանջեմ։ Այս ալ սովորական երեւոյթ էր, քանի որ անցեալին քաղաքի վարչութեան փոփոխութիւններուն նոր պաշտօնակոչուածը կ՚ուզէր իր ճշդած անձնակազմով աշխատիլ։ Բայց իմ միտքը բոլորովին տարբեր էր։ Մինչդեռ ես այդ ժողովին լսել ուզած էի անոնցմէ իւրաքանչիւրին անհատական մասնագիտութիւնը եւ զբաղմունքը։ Այս ալ զարմանալի թուացած էր, քանի որ ինձմէ առաջ ոչ ոք հետաքրքրուած էր իր գլխաւորած կազմի անդամներուն ասպարէզներով։
Նախապէս հարցազրոյց մը ունեցած էի ձեր կուսակցութեան շրջանային վարչութիւններէ պատասխանատու Աթէշ Իլյաս Պաշսոյի հետ։ Պաշսոյ յայտնած էր թէ Էքրեմ Իմամօղլուի յաղթանակը կուսակցութենէ ներս կատարուած փոփոխութիւններու հետեւանքն է եւ ինք այդ փոփոխութիւններուն արդիւնքն է միայն։
Ամբողջովին կը ձայնակցիմ Պաշսոյի խօսքերուն։ Ես ալ այդ փոփոխութեան մէկ հետեւանքն եմ։ Բայց այստեղ կ՚ուզեմ յաւելեալ հաստատում մը եւս ընել։ Ճանան Քաֆթանճըօղլու համագումարի ընթացքին նախկին հասկացողութեան դէմ բուռն հակազդեցութիւն ցուցաբերած եւ այդ հակազդեցութիւնն ալ կազմակերպութեան կողմէ դրական գնահատուած է։ Այսինքն այդ արձանագրուած փոփոխութիւնն ալ պայքարի մը հետեւանքն է։
Քիչ առաջ նշեցիք, որ կ՚ակնարկէք երկարատեւ պայքարի մը։ Ի՞նչ է յառաջիկայի մասին ձեր ակնկալութիւնները։
Մինչեւ օրս անհատական հաշիւ մը չեմ հետապնդած։ Իմ հեռանկարս եղաւ Թուրքիոյ մէջ մարդկանց իրարու հետ առանց բանավէճի կարենալ խօսելու գետինը պատրաստել։ Կը պայքարիմ հաշտ ու համերաշխ Թուրքիայի մը հեռանկարով։ Ես ալ բոլոր քաղաքացիներու նման կը տեսնեմ, որ քաղաքական դաշտի մէջ նոր շրջանի մը թեւակոխած ենք։ Քաղաքացիներու միջեւ խտրականութիւն եւ թշնամութիւն հրահրող ռազմավարութեան փոխարէն իրերհասկացողութեան եւ համերաշխութեան ձգտելու մարմաջը ունիմ։
