ՄԻՀՐԱՆ ՄԱՆՈՒԿԵԱՆ
miran.manukyan@gmail.com
Նախորդ շաբաթավերջին Սամաթիա Սուրբ Գէորգ Եկեղեցւոյ Սահակեան Վարժարանի ի նպաստ սարքուելիք Սիրոյ սեղանի ընդառաջ կայացած ժողովին արձագանգները կը շարունակուին։ Այդ ժողովի ընթացքին Սուրբ Փրկիչ Հիւանդանոցի Հոգաբարձութեան Ատենապետ Պետրոս Շիրինօղլու իր ելոյթով թիրախ ունեցած էր Կեդրոնական Վարժարանը։ Շիրինօղլուի համաձայն ազգային վարժարանը միլիթաններ կը պատրաստեր։ Բացի այդ Շիրինօղլու պնդեց թէ դպրոցի շէնքը խարխուլ է հաւանական երկրաշարժի մը դիմաց։ Ատենապետի այս ելոյթը բնականաբար արժանացաւ յատկապէս կեդրոնականցիներու, բայց անոնց հետ միասին համայնքային լայն խաւի մը մեղադրանքին։ Նախ եւ առաջ մասնագէտներ եւ դպրոցի վարչութիւնը անհիմն կը գտնէին դպրոցի շէնքին հաւանական երկրաշարժի մը դիմաց խարխուլ ըլլալու պնդումը։ Անոնք այս պնդումը անտեղի կը համարեն, դիտել տալով՝ թէ մասնագէտներ անցեալին ուսումնասիրած են շէնքը եւ վստահեցուած, թէ ան բաւականին կանգուն է եւ վտանգ մը չի սպառնար հաւանական երկրաշարժի մը դիմաց։ Ուրեմն կ՚արժէ հարցնել, թէ այս պայմաններու տակ ի՞նչ նպատակ կը հետապնդէ պարոն Շիրինօղլուի խօսքերը։ Իրականութեան մէջ այդ պնդումներու ետին կայ Պոլսոյ կարգ մը վարժարանները փակելու կամ գոնէ իրարու միացնելու միտքը։ Ըստ Շիրինօղլուի այսպէսով խնայուած պիտի ըլլայ բաւական լուրջ գումար մը։
Անշուշտ որ հասարակութիւններ կրնան նկատի ունենալ տուեալ ժամանակահատուածի թելադրած պայմանները եւ ըստ այնմ նոր ռազմավարութիւններ իւրացնել։ Բայց այդ բոլորը կը պարտի հասարակութեան հաւաքական միտքով արդարանալու։ Ապա թէ ոչ մեր դարաւոր հաստատութիւնները դիւրաւ կրնան զոհը դառնալ անհեռատես քաղաքականութիւններու։
Արդարեւ այս մասին զանազաններ իրենց դժգոհութիւնը յայտնած են Շիրինօղլուի դէմ, զայն հրաւիրելով աւելի զգոյշ մնալու։ Այս մասին աւելի ընդարձակ տեղեկութիւնը եւ բազմաթիւ կարծիքներ տեղ գտած են թերթիս այլ էջերուն վրայ։