Նախաձեռնարկ մարմնի որոշումէն ետք թափ ստացած են Արամ եւ Սահակ սրբազաններու քարոզարշաւները։ Անոնք ժողովուրդի հետ հանդիպումներ կը կազմակերպեն քաղաքի զանազան թաղերուն մէջ եւ կը փորձեն համոզիչ բացատրութիւններով ներկայացնել իրենց ծրագիրները, որ պիտի գործադրեն պատրիարք ընտրուելէ ետք։ Այսպէս Արամ սրբազանի Եէշիլգիւղի մէջ կազմակերպած ժողովին հետ նոյն ժամերուն նման բնոյթով ժողով մըն ալ կազմակերպեց Սահակ եպիսկոպոս Մաշալեան Սկիւտարի Ներսէսեան միութեան երդիքին տակ։
Սահակ Սրբազան զանազան խոստումներու կողքին խոստացաւ նաեւ, թէ իր պատրիարքութեան շրջանին Պատրիարքարանը որեւէ գանձում պիտի չընէ մէկ քահանայով կատարուած արարողութիւններու պարագային։ Ան նաեւ մեկնաբանութիւններ ըրաւ կառավարութեան յղած կանոնագրին առարկելու շուրջ։ Սրբազանը պնդեց թէ, եթէ առարկութիւն մը ըլլար պատրիարքական ընտրութիւնը անգամ մը եւս պիտի յետաձգուէր դէպի անորոշ թուական։ Անշուշտ հարցական է, թէ սրբազանի այս ենթադրութիւնը ո՞ր հիման վրայ կը կայանայ։ Միւս կողմէ «Ակօս» կապ հաստատեց արտասահմանի կարգ մը հոգեւորականներուն հետ լսելու համար անոնց կարծիքը ներկայ գործընթացի շուրջ։
Այսպէս Խաժակ արքեպիսկոպոս Պարսամեան կը յայտնէ թէ սխալ եղած է այս որոշումին չառարկել։ «Ակօս»ին. «Եթէ դուք ալ թեկնածու ըլլայիք արդեօք կանոնադրութիւնը դարձեալ այսպէս կու գա՞ր» հարցումին պատասխանելով սրբազանը յայտնեց թէ, եթէ ինք թեկնածու ըլլար այս խնդիրը երկու տարի առաջ արդէն իսկ լուծուած պիտի ըլլար։ «Ես նախապէս ալ յայտնած էի, թէ համայնքի տարբեր խաւերը ներկայացնող երկու կամ երեք հոգիէ բաղկացեալ պատուիրակութիւնը այցելէ Անգարա եւ իշխանութիւններուն բացատրութիւններ տայ պէտք եղած կարգադրութեան մասին։ Եթէ խաղաղ ու համերաշխ մթնոլորտին մէջ նման հանդիպում մը ապահոված ըլլայինք, ես կը կարծեմ թէ խնդիրը այս փուլին չէր հասներ։ Նոյնը այսօր ալ ի զօրու է։ Այսօր ալ կարելի է շինիչ ոճով բացատրել ամէն ինչ, որմէ ետք ես կը կարծեմ թէ կ՚ապահովուի մեր աւանդութիւններու համապատասխանող ընտրութեան գործընթացք մը»։ Խաժակ սրբազան համոզուած է թէ նոր ընտիր պատրիարքը պիտի յաջողի համայնքէ ներս տիրող պառակտումը որոշ ժամանակի մէջ լուծելու եւ ազգային միասնութիւնը վերահաստատելու գործը։
Վիգէն արքեպիսկոպոս Այքազեան եւս կը բաժնէ Խաժակ սրբազանի կարծիքները, ըսելով թէ անպայման պէտք էր առարկել եկած կանոնագրին դէմ։ Այդ առարկութիւնը բոլոր քաղաքակիրթ երկիրներէ ներս կը դիտուի մարդու իրաւունքներու բնական մէկ արտայայտութիւնը ըլլալով։ «Այս բոլորը կ՚ըսեմ առանց նկատի ունենալու թէ ով կ՚ընտրուի կամ ով չնտրուիր։ Սա սկզբունքային խնդիր է։ Կապ չունի անձերու նախասիրութեան հետ։ Վերջապէս նման ընթացքի մէջ տուժողը ո՛չ թէ այս կամ այն եպիսկոպոսն է, այլ ընտրելու իրաւունքը յափշտակուած պոլսահայութիւնը։
Միւս կողմէ Գարեգին արքեպիսկոպոս Պէքճեան ցարդ յստակ պատասխան մը չէ փոխանցած իրեն կատարուած դիմումին դիմաց։ «Որքան ալ յստակ պատասխան մը փոխանցած չըլլամ ես տակաւին կը յամառիմ եկած պայմանագիրը մերժելու վարկածին վրայ» ըսաւ Պէքճեան սրբազան։