Հրանդ Տինք Հիմնարկի նախաձեռնութեամբ կազմակերպուած «Կեսարիոյ եւ շրջակայքի հասարակական, մշակութային եւ տնտեսական պատմութիւնը» խորագրեալ միջազգային երկօրեայ բանախօսութիւնը Շիշլիի գաւառապետի որոշումով արգիլուեցաւ։
Նախապատրաստութիւնները տարի մը առաջ սկսած միջոցառման համար ատենախօսներ հրաւիրուած էին ԱՄՆ, Ֆրանսա, Յունաստան, Հայաստան եւ Թուրքիոյ զանազան քաղաքներէն։ Գիտական յանձնախումբը կատարուած դիմումներէն ընտրած էր 27 զեկոյցներ, որոնց հեղինակները արդէն իսկ հասած էին Իսթանպուլ, իրենց նիւթերը ներկայացնելու համար։
Շիշլիի գաւառապետը միջոցառման սկսելէն ընդամէնը 16 ժամ առաջ տեղեկացուց չեղեալ համարելու մասին որոշումը։ Ուշագրաւ էր նաեւ որոշման փոխանցման ժամը՝ 17.08։ Գաւառապետը դիտումնաւոր կերպով ուշ տեղեկացուած էր, որպէսզի կարելի չըլլայ օրինական որեւէ կանխամիջոցի դիմել։ Որքան որ արգիլումը տեղեկացնող գրութեան մէջ յատուկ պատճառաբանութիւն չէ նշուած, ակնարկուած է, թէ որոշումը կայացած է 2911 համար օրէնքի սահմաններով։
Հրանդ Տինք Հիմնարկին կատարած յայտարարութեան մէջ կը նշուի նաեւ, թէ նման բնոյթով գիտաժողովներ կայացած են Ատանայի, Տիարպէքիրի, Վանի, Մարտինի, Անգարայի եւ Զմիւռնիոյ հասարակական, մշակութային եւ տնտեսական պատմութիւնները ուսումնասիրելու միտումով։
Սոյն աշխատութիւնը կը հովանաւորուէր Եւրոմիութեան եւ Թուրքիոյ Հանրապետութեան Եւրոմիութեան նախարարութեան կողմէ։
Հրանդ Տինք Հիմնարկի վարչութեան անդամ եւ իրաւաբանական խորհրդատու Ֆեթհիյէ Չեթին ժողովին 2911 համար օրէնքի սահմաններով արգիլուելու երեւոյթը մեկնաբանեց «Ակօս»ին համար։
«Հիմնարկները իրենց գործունէութեան յայտարարագրին ծիրէն ներս կատարած աշխատութիւններով դուրս կը մնան 2911 թուակիր օրէնքի սահմանէն։ Այս օրէնքը սահմանուած է հանրահաւաքներու եւ երթերու համար։ Հրանդ Տինք Հիմնարկը նախապէս զանազան անգամներ իրականացուց նման բնոյթի գիտաժողովները։ Մինչեւ այս ոչ մէկ խոչընդոտի հանդիպած էինք։ Իսկ այս անգամ առաջին արգելքը եկաւ Կեսարիոյ կուսակալութենէ։ Հոն եւս պատճառաբանութիւնը հիմնուած էր նոյն օրէնքի վրայ։ Տուեալ օրէնքի 23-րդ յօդուածը կ՚ըսէ թէ, եթէ խնդրոյ առարկայ է հասարակութեան անվտանգութիւնը եւ առողջութիւնը կուսակալութիւնը կրնայ արգիլել նման ժողովներն ալ։ Այս արգելքը սակայն ոչ թէ հասարակութեան անվտանգութեան, այլ պարզապէս կատարուած աշխատանքը կացինահարելու միտումով գործադրուած է»։ Չեթին յայտնեց, թէ այս միջամտութեան դէմ դատարան դիմելու որոշումը պիտի կայացնէ հիմնարկի վարչութիւնը։