Լրագրող Ահմետ Ալթան երեք տարուայ բանտարկութենէ ետք, 5 Նոյեմբերին ազատ արձակուած էր։ Ալթան կը մեղադրուէր 15 Յուլիսի անյաջող յեղափոխութեան գետին պատրաստող գրառումներ ընելու մեղադրանքով։ 5 Նոյեմբերի նիստին դատարանը 10,5 տարուայ բանտարկութիւն վճռեց լրագրողին դէմ, եւ ապա բանտարկութեան պայմաններու մէջ անցած ժամանակը նկատի ունենալով զինք ազատ թողուց դատական հսկողութեան մէջ մնալու պայմանաւ։ Դատախազութիւնը ինչպէս նախապէս ալ նմանը եղած էր այլ քաղբանտարկեալներու օրինակին, այս անգամ ալ շուտափոյթ կերպով առարկեց դատարանի այս վճռին դէմ եւ յաջողեցաւ վերստին բանտարկութեան որոշում կայացնել։
Այսպէս Ահմետ Ալթան 12 Նոյեմբերին կրկին անգամ բերման ենթարկուեցաւ իր բնակարանէն եւ կէս գիշերի ժամերուն ուղարկուեցաւ նախ Վաթան պողոտայի վրայ գտնուող ոստիկանական բաժանմունք եւ ապա Սիլիվրիի արգելանոցը։
Ալթանի փաստաբան Ֆիկեն Չալըքուշու ծիծաղելի համարեց այս զարգացումը, որ երբեք չի համապատասխանէր օրէնքի ընդունուած գործադրութիւններէն որեւէ մէկուն։ «Իրաւական համակարգը կամայականութեան ենթակայ է այսօր եւ կարելի չէ նման համակարգէ մը արդարութիւն յուսալ» ըսաւ փաստաբան Չալըքուշու։
