Ֆրանսայի հայ կազմակերպութիւններու համակարգող խորհուրդը (CCAF) այս տարուայ աւանդական ընթրիքին պատուեց անուանի պատմաբան Թաներ Աքչամը։ Աքչամի «Նայիմ Էֆենտիի յուշագրութիւնը» եւ «Թալաթ Փաշայի հեռագիրները» անուն ուսումնասիրութեան ֆրանսերէն թարգմանութիւնը նախորդ շաբաթներուն կատարուած էր եւ գիրքը տրամադրուած ֆրանսախօս ընթերցողի ուշադրութեան։ 29 Յունուարի երեկոյեան կայացող ընթրիքին ներկայ գտնուեցաւ նաեւ նախագահ Մաքրոն։ Այս առթիւ Մաքրոն շնորհաւորեց Թաներ Աքչամը ցեղասպանութեան միջազգային ճանաչման գործընթացին մէջ իր ծաւալած աշխատութեան համար։ Ան իր ելոյթին մէջ նշեց թէ Ֆրանսա 19 տարիներ առաջ պաշտօնապէս ճանչցած է Հայոց ցեղասպանութիւնը եւ այժմ կը պատրաստուի ցեղասպանութեան ժխտումը դատապարտող օրինագծի մը վրայ։ «Ոմանց մոռնալ նախընտրածը դուք յայտնաբերեցիք եւ այս արդիւնքը կարեւոր անկիւնադարձ մըն է թուրք վարչականներու հետ շարունակուող տարակարծութեան մէջ։ Հայոց ցեղասպանութեան ճանաչման համար տարած պայքարը միաժամանակ անձայնութեան դէմ, մոռացութեան դէմ պայքար մըն է»։ Ընթրիքի ընթացքին Աքչամ պարգեւատրուեցաւ քաջութեան շքանշանով։