ՔՐԻՍՏԻՆԱ ԱՂԱԼԱՐԵԱՆ
Երեւան՝ DoubleTree by Hilton հիւրանոցի մէջ, Փետրուարի 2-ին տեղի ունեցաւ լրագրող, միջազգայնագէտ Սարիկ Սեւադայի «Հայրենադարձի աչքերով» գրքի շնորհանդէսը։ Հեղինակը գրքի մէջ 30 հարցազրոյց, 30 վերադարձի պատմութիւն ներկայացուցած է։ Սեւադայի նպատակը եղած է՝ խրախուսել հայրենադարձութիւնը։ Յատուկ օրինակներով միւսներուն եւս հայրենադարձութեան կոչ ընել։ Դահլիճը լեցուն էր եւ խօսիլ ցանկացողներուն թիւը՝ մեծ։ Գիրքը իր ձեւաչափին մէջ առաջին օրինակ կը համարուի։ Ան նուիրուած է ոչ այնքան Հայաստան արդէն բնակութիւն հաստատած հայրենադարձներուն, որքան հայրենիքէն հեռու այդ ցանկութիւնը թաքուն փայփայողներուն։
Հեղինակի խօսքով՝ 30 հայրենադարձներու մասին յաջողուած պատմութիւնները բաւարար են, որպէսզի հիմք հանդիսանան հայրենադարձներու թիւի շատացմանը։ Սարիկ Սեւադան կը նախատեսէ 2020 թուականին եւս շարունակել յօդուածներու շարքը եւ մօտ 50 հայրենադարձի պատմութիւնը ներկայացնել։ Պատմութիւնները ոգեւորիչ էին եւ ներկաները ոգեւորուած։ Դահլիճի մէջ էին նաեւ գրքի հերոսները՝ հայրենադարձները։ Անոնք հայրենիքին ի նպաստ բաւական լուրջ գործունէութիւն ծաւալած են՝ տարբեր ոլորտներու մէջ։ Յաջողակ գործարարներ են, հասարակական գործիչներ, տեղեկատուական տեխնոլոգիաներու մասնագէտներ, մարզիչներ եւ այլն։ Սարիկ Սեւադայի գրքի ազդեցութիւնը կարող է հայրենադարձութեան համար նոր զարթօնք ապահովել։
Դահլիճին գտնուող ներկայ սփիւռքահայերը եւ հայրենադարձները եւս կարծիքներ յայտնեցին գրքի առանձնակի կարեւորութեան մասին։ Ներկայացնելով սեփական փորձառութիւնները, հայրենիքին տարբեր տարիներուն հաստատուած հայրենադարձները ենթահող կը ստեղծեն նորերու համար։ Լիբանանի «Զարթօնք» օրաթերթի գլխաւոր խմբագիր Սեւակ Յակոբեանի խօսքով՝ այս գիրքը հոյակապ նախաձեռնութիւն է, որու կարիքը սփիւռքն ու Հայաստանը ունի։
Ըստ անոր՝ շատ լաւ կ՚ըլլայ, եթէ գիրքը արեւմտահայերէն եւս հրատարակուի, որպէսզի սփիւռքահայ ընթերցողին եւս հասկնալի ըլլայ։
Ներկաները իրենց ելոյթներուն միաձայնութեամբ հաստատեցին այն հանգամանքը, որ այս գիրքը մեծ կարեւորութիւն ունի սփիւռքի մեր հայրենակիցներուն համար։ Հարցազրոյցներու հերոսներէն մի քանին իրենց խօսքին մէջ շնորհակալութիւն յայտնեցին հեղինակին, յիշեցին հարցազրոյցի անցկացման հետաքրքիր դրուագներ եւ կոչ ըրին բոլոր սփիւռքահայերուն վերադառնալ հայրենիք։
Լսելով ներկաներու ջերմ ու դրական կարծիքները, Սեւադան իր ելոյթին սկսաւ նախ շնորհակալութիւն յայտնելով Սահակեան- Բագրամեան հիմնադրամին՝ ի դէմս Պրուքլինի հայ համայնքի ղեկավար Տիգրան Սահակեանին՝ գրքի տպագրութիւնը հովանաւորելուն համար։
«Շատ հաճելի է, երբ հայրենադարձութեան թեմայով ֆինանսաւորումը կը ստանաս սփիւռքէն։ Գիրքս ստեղծելու գաղափարը առաջացաւ այն ժամանակ, երբ որպէս լրագրող կ՚աշխատէի Սփիւռքի նախարարութեան մէջ։ Ընթացքին հասկցայ, որ կարելի է մէկտեղել բոլոր հարցազրոյցները։ Շատ յաջողուած պատմութիւններ են եւ թիրախաւորումը ըլլալու էր սփիւռքի մէջ, որպէսզի սփիւռքի երիտասարդները վճռական ըլլան հայրենադարձման գաղափարին։ Յաջորդ շնորհակալութիւնս կ՚ուզեմ յայտնել գրքի խմբագիր Կարինէ Աւագեանին, որուն ուղղորդող յորդորներու շնորհիւ է այս գիրքը ծնած։ Կ՚ուզեմ շնորհակալութիւն յայտնել բոլոր հայրենադարձներուն, ովքեր միս ու արիւն տուին իմ այս նախաձեռնութեանը։ Եթէ դուք չըլլայիք, իմ այս նախագիծը չէր ըլլար»։
Միջոցառման աւարտին Սարիկ Սեւադան գրքի 30 հայրենադարձ հերոսներուն, որոնք ներկայ էին արարողութեանը, յատուկ մակագրութեամբ գիրքը նուիրեց, ապա բոլոր ցանկացողներուն սիրով յանձնեց 30 հայրենադարձի մասին պատմող կարեւոր աշխատութիւնը։