Եթէ շաբաթ մը առաջ երկրի օրակարգը զբաղեցնող գլխաւոր նիւթն էր Քորոնա ժահրը, նախորդ հինգշաբթի երեկոյեան Սուրիոյ մէջ Թրքական բանակին ենթարկուած զինեալ յարձակումը իսկոյն շրջեց այդ երեւոյթը։ Ամբողջ շաբաթ մըն է, որ բոլոր լրատուամիջոցները կ՚անդրադառնան Իտլիպի մէջ պատահածներուն եւ անոր հետեւանքներուն։ Իսկապէս ալ առնուազն 33 զինուորներու մահը անակնկալ մըն էր երկրի հասարակութեան համար։ Բայց հակազդեցութիւնը դարձեալ անակնկալ մը եղաւ, երբ նախագահ Էրտողան յայտարարեց, թէ արգելք պիտի չ՚ըլլայ երկրի մէջ բնակող ապաստանեալներուն դէպի արեւմտեան երկիրներ գաղթին։ Արտաքին քաղաքականութեան մէջ շատ լուրջ շեղում մըն էր այս մէկը, քանի Թուրքիա գլխաւորութեամբ Գերմանիոյ դաշնութեան վարչապետին, Եւրոպական զանազան քաղաքական գործիչներու հետ կնքած էր համաձայնութիւն, սուրիացի գաղթականները երկրի մէջ պահելու մասին։
Նախագահի յայտարարութենէն ետք երկրի տարբեր քաղաքներէն բազմաթիւ գաղթականներ խուժեցին դէպի Յունաստանի սահմանագիծը։ Անոնք այս նոր զարգացումէն իրազեկ եղած էին շշուկի մամուլի միջոցաւ։ Կարծած էին թէ Թուրքիա երբ ընթացք կու տայ երկրէն դուրս ելլելու, հարեւան պետութիւնն ալ նոյն հեշտութեամբ պիտի բանայ դռները եկուոր գաղթականներու դիմաց։
Իրողութիւնը բոլորովին տարբեր էր։ Էրտողան գիտէր թէ յունական կողմը գրկաբաց պիտի չ՚ընդունի գաղթականներու հոսքը։ Եւ այդպէս ալ եղաւ, գաղթականներ առանց որեւէ գործողութեան կամ մաքսային ստուգման պիտի կրնային ելլել Թուրքիայէն, բայց դառն փորձութեամբ տեսան, թէ պիտի չկարենան մտնել Յունաստան, որ Եւրոմիութեան արեւելեան դարպասը կը համարուի։
Գաղթականները բիրտ ու բռնի վերաբերմունքով ետ շպրտուեցան Յունաստանի սահմանապահ ոստիկաններու ձեռամբ։ Մինչ այդ սահմանագծի Թրքական հատուածի վրայ կը տիրէր կատարեալ անտէրութիւն։ Մանաւանդ արեւամուտէն ետք ցուրտ քամի կը տիրէր տարածքի վրայ, ուր գաղթականները պաշտպանուելու ոչ մէկ միջոց ունէին։ Նախագահ Էրտողան Եւրոպայի դիմաց անգամ մը եւս յաջողած էր իր սպառնալիքներով, որուն զոհը կը դառնային բազմաթիւ գաղթականներ։
Մարդկային ողբերգութիւն մըն է, որ կը կատարուի Յունաստանի սահմանին վրայ, երբ աւելի մարդավայել պայմաններու տիրանալու ակնկալութեամբ սահման խուժած մարդիկ նոր յուսալքութեամբ, նոր հիասթափութեամբ կը վերադառնան իրենց եկած քաղաքները։ Ցաւալի է այն իրողութիւնը, որ անոնք նախքան այս ճամբորդութիւնը իրենց բոլոր ունեցուածքը սպառած էին վերջին պատրաստութիւններու եւ աւելին, ահագին ծախսեր ըրած էին քաուչուք նաւեր ապահովելու համար։ Վերջապէս մարդկային ողբերգութիւն մըն է, որ կ՚ապրուի շնորհիւ նախագահ Էրտողանի դաւադրական ռազմավարութեան, եւրոպացիներու կատարեալ անճարակութեան եւ բացի սուրիացիներէ աֆղանիստանցի, իրանցի, նոյնիսկ ափրիկեցի ժողովուրդի ճարահատութեան պայմաններուն տակ։
Այսօր կարելի է այս բոլորը դիտել բացարձակ անհոգութիւնով, բայց իւրաքանչիւր հայ պէտք է իր մտքին մէջ յիշած ըլլայ նոյն իր ժողովուրդին 100 տարի առաջ ապրած ողբերգութիւնը։
Ցաւալի է տեսնել այլ իրողութիւն մը եւս, որու համաձայն ոչ զեհերը փոխած են իրենց դիրքը եւ ոչ ալ դաժան ոճրագործները։