Ինչպէս զանազան երկիրներ, Թուրքիոյ մէջ ալ «Քովիտ 19»ի համաճարակը լուրջ մտահոգութիւն յառաջացուցած է բանտարկեալներուն համար։ Գաղտնիք չէ, որ բանտի պայմաններու մէջ բաւականին խնդրայարոյց է անհրաժեշտ մաքրութեան միջոցներու տիրանալ։ Այս ալ կարեւոր սպառնալիք մը ըլլալով կը ներկայանայ, որուն հետեւանքները կանխելու համար գլխաւորութեամբ Իրանի, կարգ մը երկիրներ որոշած են ժամանակաւոր կերպով տուն ղրկել բանտարկեալները։
Թուրքիոյ մէջ արդէն միջոցէ մը ի վեր կը խօսուէր ընդհանուր ներումի համազօր կանոնադրութեան մը մասին, որուն շնորհիւ ըստ այդ նախագծի հեղինակ Տեւլեթ Պահչելիի, ազատ պիտի արձակուին մեծ թիւով յանցագործներ։
Միւս կողմէ այս անհրաժեշտութիւն մըն է նաեւ, քանի որ Թուրքիոյ բանտերու ծանրաբեռնուածութիւնը հասած է անընդունելի համեմատութեան։
Մարդու իրաւունքի պաշտպաններ այդ համեմատութիւնը կը նշեն %125։
Արդարեւ կառավարութիւնը եւ անոր անմիջական գործակից Ազգային Շարժում Կուսակցութիւնը միասնաբար պատրաստած են օրէնքի նախագիծ մը եւ փոխանցած Խորհրդարան։ Այս նախագծի ամենավիճելի երեւոյթը այն է, թէ քաղբանտարկեալներ առհասարակ զերծ կը պահուին այս կարգադրութենէն։
Թուրքիոյ Էրտողանի իշխանութեան տակ հնարած կարեւոր անարդարութիւններէն մէկն ալ այն է, որ իշխանութիւնը քննադատող ամէն կարծիք կ՚ընդունուի որպէս ահաբեկչութիւն կամ ահաբեկչութեան հետ առնչուած յանցագործութիւն։
Դատարանները դիւրաւ կը շեղեն կատարուած մեղադրանքը եւ կը վերածեն ահաբեկչական կազմակերպութեան քարոզչութեան։ Այդ մեղադրանքը հնչեցուցած պահուն պարզելու կարիքը իսկ չէր զգար, թէ նիւթը ո՞ր ահաբեկչական կազմակերպութեան հետ կապ ունի։ Նոյնիսկ եթէ նման բացատրութեան անհրաժեշտութիւն գոյանայ, առանց վարանումի իրարու կը կապեն գաղափարական առումով երբեք միմեանց հետ կապ չունեցող զանազան կազմակերպութիւնները։ Ըստ երեւոյթի կողմ ձայները բաւարար պիտի ըլլան եւ այս բանաձեւը պիտի վաւերացուի նաեւ Խորհրդարանի կողմէ։ Միւս կողմէն ընդդիմութիւնը կը պահանջէ, թէ եթէ ոչ պատիժ ստացածները, ազատ արձակուին գոնէ ձերբակալեալները։
Վերջապէս Թուրքիոյ օրէնսգիրքն ալ կ՚ընդգծէ թէ ձերբակալութիւնը արտակարգ միջոց մըն է, որուն կարելի է դիմել, երբ մեղադրեալի փախչելու հաւանականութիւնը կայ։
Սակայն Էրտողանի կառավարութիւնը երկար ժամանակէ ի վեր կ՚անտեսէ այս իրաւաբանական սկզբունքը եւ ձերբակալութիւնները կը գործադրէ իբրեւ պատժամիջոց։
Այս պայմաններու տակ անմիջապէս յիշուած անուններ են Սելահատտին Տեմիրթաշ, Ֆիկեն Եիւքսեքտաղ, Օսման Քաւալայի նման բանտարկեալներ, որոնց դատավարութիւնը ցարդ կը շարունակուի բանտարկութեան ծանր պայմաններու տակ։
