Պետական պաշտօնեաներու դատավարութիւնով ընթացող Հրանդ Տինքի սպանութեան խնդիրը անգամ մը եւս դատարան կու գայ 15 Դեկտեմբեր երեքշաբթի օր։ 24 Նոյեմբերին կատարուած վերջին նիստին դատախազի եզրակացութիւնը պատրաստելու համար դատավարութիւնը յետաձգուած էր 15 Դեկտեմբերին։ Նկատի ունենալով որ դատակազմը մերժած էր Տինք ընտանիքի պահանջները, կարելի է ենթադրել թէ դատը կը մօտենայ աւարտին։ Այս դատի հետ առնչուած Ռամազան Աքեիւրեք, Ալի Ֆուաթ Եըլմազէր, Մուհարրեմ Տեմիրքալէ եւ Էրճան Կիւն կը շարունակեն ձերբակալուած մնալու։
Դատակազմը դատական թղթածրարը դատախազութեան ղրկելու որոշումէն ետք Տինք ընտանիքի իրաւապաշտպան Հաքան Պաքըրճըօղլու ըսաւ հետեւեալը. «Հրանդ Տինքի սպանութեան տանող գործընթացի եւ ոճիրի միջեւ յարատեւութիւն մը, ամուր կապի մը առկայութիւնը յստակ իրողութիւն մըն է։ Իսթանպուլի Դատախազութիւնը իր կատարած հարցաքննութեան մէջ անտեսած էր ոճիրին գործադրութեան գետին պատրաստող յարձակումները հարցաքննելէ։ Իսթանպուլի 14-րդ Եղեռնադատ Ատեանն ալ յայտարարած էր թէ ոճիրին նախորդող դէպքերը հեռու պիտի պահէ այս դատավարութենէն։ Մենք որպէս դատավարութեան կողմ եւ այս դատի գերզգայուն հասարակական զանգուած, այժմէն կը յայտարարենք թէ համոզիչ պիտի չգտնենք արձակուած վճիռը»։