Առաջին անգամ սոցցանցերուն է, որ բուռն հակազդեցութիւն ստեղծեց Քոնիա քաղաքի որմազդերը, ուր ատելութեան պատգամներ կը փոխանցուէին քրիստոնեաներու եւ հրեաներու հանդէպ։ «Անատոլիայի Երիտասարդաց Միութիւն» անուն կազմակերպութեան մը նախաձեռնութեամբ պատրաստուած որմազդերու վրայ գրուած էր հետեւեալը. «Բարեկամութիւն մի հաստատէք հրեաներու եւ քրիստոնեաներու հետ, վասն զի անոնք իրարու բարեկամներ են եւ անոնց հետ բարեկամացողն ալ անոնցմէ կը համարուի»։
Այս գրառումները տեղադրուած էին քաղաքի հանրաշարժներու կայաններուն, որուն դէմ լայնածաւալ բողոք կայացաւ, որմէ ետք քաղաքապետարանը հաւաքել տուաւ բանավէճի նիւթ դարձած որմազդերը։
Այս մասին ՀՏՓ կուսակցութեան Տիարպէքիր պատգամաւոր Կարօ Փայլան ալ հարցագիր ուղղեց Ներքին գործոց նախարարութեան, հարց տալով, թէ նախարարութիւնը ինչպէ՞ս կը մեկնաբանէ կատարուածը եւ ի՞նչ պատժամիջոցներ կը նախատեսէ կատարուած ատելութեան յանցանքի դէմ։
Միւս կողմէ մարդու իրաւունքներու միութեան համանախագահ Էրեն Քեսքին եւս բողոքեց կատարուածին դէմ ու յայտնեց, թէ այս գրառումի դէմ դատարանին պիտի դիմեն պատիժ պահանջելով։