Ներքին գործոց նախարարութեան ղրկած կանոնագիրով արգիլուած էր արտերկրի եպիսկոպոսներու պատրիարքական ընտրութիւններուն մասնակցիլը։ Երբ համացանցի, յատկապէս ալ «Դիմատետր»ի եւ «Թուիթըր»ի վրայ կը շրջին հասարակական նախաձեռնութեան գրառումները, նախորդ թուին մէջ անդրադարձած էինք հաւանական թեկնածու Խաժակ եւ Վիգէն սրբազաններու գոյացած անօրէն իրավիճակին դէմ առարկութեան։ Այս անգամ ալ Պեքճեան եւ Չուլճեան սրբազանները կը մերժեն իրավիճակը եւ կը պահանջեն, որ տեղապահը եւ Նախաձեռնարկ Մարմինը պատշաճ կերպով եւ վերատեսութեան պահանջով իշխանութեան փոխանցեն հայ եկեղեցւոյ առարկութիւնը։ Ստորեւ մեր ընթերցողներուն կը ներկայացնենք Գարեգին արք. Պեքճեանի 20 Հոկտեմբեր 2019 թուակիր նամակի բնագիրը։ Իսկ Սեպուհ արք. Չուլճեանի նամակը տեսնել հայերէն Դ էջի վրայ։
*
Գերշ. Տ. Սահակ Եպս. Մաշալեան
Պատրիարքական Տեղապահ
Իսթանպուլ, Թուրքիա
Գերաշնորհ Սրբազան Եղբայր,
Շնորհակալութիւն կը յայտնեմ ինծի ուղղեալ ձեր 9 Հոկտեմբեր 2019 թուակիր նամակին համար, որով կ՚ուզէք գիտնալ թէ արդեօք պատրիարքական թեկնածու պիտի ներկայանա՞մ կամ ոչ։
Ներկայ պայմաններու ներքոյ, երբ խախտուած են շուրջ 10 սրբազան եպիսկոպոսներու իրաւունքները եւ ջնջուած են անոնց թեկնածու ներկայանալու հնարաւորութիւնները, ես յարմար կը նկատեմ առ ի զօրակցութիւն անոնց նոյնպէս թեկնածու չներկայանալ։ Ուղեցոյցի սահմանափակումը՝ ապագայի համար Պատրիարքարանին վտանգ կը ներկայացնէ։
Կոչ եւ խնդրանք կ՚ուղղեմ միւս երկու հնարաւոր թեկնածուներուն՝ յանուն հաւասարութեան եւ արդարութեան նոյնպէս թեկնածութիւն չներկայացնել։
Եղբայրական սիրով ի Քրիստոս՝
Գարեգին Արք. Պեքճեան
