Հրանդ Տինք Հիմնարկի 18 եւ 19 Հոկտեմբեր թուականներուն համար ծրագրած միջոցառումը չէր կայացած Շիշլիի գաւառապետի միջոցառումէն ժամէր առաջ ուղարկած արգիլման լուրին բերմամբ։ Եթէ ամէն ինչ բնականոն ընդանար Կեսարիոյ մշակոյթին ձօնուած միջոցառման ընթացքին պիտի կայանար նաեւ Կեսարիոյ խոհանոցին վերաբերեալ աշխատանոց մը։ Այդ աշխատանոցը անջատօրէն գործադրուեցաւ նախորդ շաբաթ օր 26 Հոկտեմբերին հիմնարկի հաւաքատեղիին մէջ։
Տօնական մթնոլորտ կը տիրէր ամբողջ շէնքէ ներս։ Հետաքրքասէր ժողովուրդ մը փութացած էր, թէ ելոյթներ լսելու եւ թէ ինչու չէ ճաշեր պատրաստելու համար։ Օրուայ գլխաւոր ճաշն էր Կեսարիոյ մանթըն, որ պատրաստուեցաւ տարբեր միջուկներով եւ տարբեր չափերով։ Մանթըի պատրաստութեան աւանդութեան մասին խօսուեցան խիստ շահեկան զեկոյցներ։ «Ակօս»ի սիւնակագիր Լեւոն Պաղըշի ժողովավարութեամբ Եըլտըզ Հորաթա, Լէյլա Քըլըչ, Թագուհի Թովմասեան եւ Սալփի Ղազարեան շատ հաճելի զրոյց մը ունեցան մանթըի պատրաստման համարեա ծիսական աւանդութիւններու շուրջ։
Անարատ յղութիւն շէնքի երեք յարկերու վրայ ալ զգալի էր տօնական մթնոլորտը, որուն կարեւոր ազդակներէն մէկն ալ անչափահասներու ներկայութիւնն էր։ Այսպէս գրեթէ բոլոր տարիքներէ երախաներ իրենց համար զուարճալի ապրումներ վայելեցին մերթ խմոր թխելով, մերթ պարտէզի նռննենի նկարելով եւ մերթ ալ պարզապէս անառակօրէն խաղալով։ Այս բոլորը բնութագրելու համար պահ մը կրնանք խորհիլ թէ երախաներու ճչոցին մէջ կրկին անգամ կը խայտար Հրանդի հոգին, տեսնելով մանկական այս ուրախութիւնը։
Օրուայ աւարտին համար պատրաստուած էր երաժշտական խիստ շահեկան յայտագիր մը։ Նշենք որ յայտագիրի շահեկանութիւնը կու գար անոր յանկարծաբանական մտերմութենէն։ Նախապէս իրար հետ չաշխատակցած բազմաթիւ երաժիշտներ, այս առթիւ կողք կողքի եկած էին եւ մեծ ներդաշնակութեամբ ներկայացուցին Կեսարիոյ շրջակայքին յատուկ զանազան ժողովրդական երգեր։ Այդ երաժիշտներն էին Սուրբ Երրորդութիւն Եկեղեցւոյ վաստակաւոր դպիր Մուրատ Իչլինալչա, որ իր երգերուն հետ նաեւ կը նուագէր պաղլամա կամ լաւթա։ Անոր կողքին էր դարձեալ մտերմութիւնով բոլորին սրտին մէջ տեղ գտած՝ երգչուհի Այշէնուր Քոլիվար։ Այշէնուր կրնայ երգել Սեւ Ծովեայ տարածքի բոլոր լեզուներով։ Բայց այս անգամ նկատի ունենալով Կեսարիոյ մէջ չերքէզներու բնակչութեան մեծ համեմատութիւնը, նախընտրեց չերքէզներէն երգ մը երգել։
Բեմին վրայ էին նաեւ «Ոմանք» խումբէն Ռուբէն Մելքիսեթօղլու քլարնեթով եւ Արի Հերկել կիթառով։ Մուամմեր Քեթենճիօղլուի աքորտիոնի կողքին, հարուածային գործիքներով Պուրհան Հաստեմիր եկած էր այս կազմը ամբողջացնելու։