Հայաստանէն Սամուէլ Ֆելեքեան հարցազրոյց մը ունեցաւ ՀՀ Ազգային Ժողովի նախկին պատգամաւոր Արագած Ախոյեանի հետ, նիւթ ունենալով 12 Յուլիսին Հայաստան- Ատրպէյճանի սահմանագծի Տաւուշի հատուածին տեղի ունեցած զինեալ բախումները են հետեւանքները։
Ինչպէ՞ս կը մեկնաբանէք Հայաստան- Ատրպէյճան սահմանագծի վրայ վերջին բախումները։
Հայ- Ատրպէյճանական սահմանի բախումները ունին մշտական բնոյթ։ Վստահ եմ թէ Ատրպէյճանական սադրանքները կը շահագործուին ներքաղաքական շահերու համար։ Յաճախակի յարձակումներով կը փորձեն կերակրել սեփական ժողովուրդը, արդարացնելով ոչ կառուցողական եւ երկար տարիներ փակուղի մտած Ղարաբաղեան հիմնախնդիրը։ Պաքուն պէտք է հասկնայ թէ այսպիսի անարժան գործողութիւններով կարելի չէ յառաջանալ։ Վերջապէս կը տուժեն սահմանամերձ գօտիի խաղաղ բնակիչները։ Ունինք երկկողմանի մարդկային կորուստներ։ Երիտասարդ կեանքերու, որբացած երախաներու եւ որդեկորոյս մայրերու մասին է խօսքը։ Ես կը ցաւիմ զոհուած իւրաքանչիւր զինուորի համար։ Իմ համար նշանակութիւն չունի ազգութիւնը։ Այս մեթոտներով, այսինքն Ատրպէյճանի վարած քաղաքականութեամբ ոչ մի տեղ հասնիլ կարելի է։
Ինչե՞ր կ՚առաջարկէք տարածաշրջանի խաղաղութիւնը ապահովելու համար։
Մեր տարածաշրջանը այն խաչմերուկն է, ուր կը հատուին ոչ միայն տեղւոյն հարեւան երկիրներու հետաքրքրութիւնները, այլ նաեւ գերտէրութիւններու շահերը։ Տարածաշրջանը նաեւ կը հանդիսանայ տարբեր քաղաքակրթութիւններու խաչմերուկ։ Մենք պէտք է հանդուրժողականութիւն, յատուկ վերաբերմունք եւ յարգանք ցուցաբերենք իրարու նկատմամբ։ Կան չլուծուած բազմաթիւ խնդիրներ, որոնք պատմութեան ժառանգութիւնն են մեզ։ Մենք պէտք է արդար նայինք բոլոր հարցերուն։ Նաեւ մտածենք թէ ինչպէս վերացնենք 1915 թուականի ցեղասպանութեան հետեւանքները։ Այս խաչմերուկին կ՚ապրին հանճարեղ ժողովուրդներ, որոնք օժտուած են հարուստ մշակոյթով։ Անոնց ներուժը կարելի է ուղղորդել տարածաշրջանի խաղաղութեան կայունութեան, եւ ինչո՞ւ չէ, տարածաշրջանը դրախտի վերածելու ուղղութեամբ։
Ինչպէ՞ս կը գնահատէք Թուրքիոյ դիրքորոշումը։
Թուրքիան տարածաշրջանի մէջ կրնայ խնդիրներ ստեղծող պետութենէն լուրջ դերակատարում ունեցող պետութեան վերածուիլ։ Եթէ կարենայ վերանայիլ իր վարած քաղաքականութեան, առերեսուի պատմութեան հետ, իր մէջ ուժ գտնէ իր իսկ երկրէ ներս ապրող տարբեր ժողովուրդներու մշակոյթը, լեզուն, կողոպտուած ազգային արժէքները վերադարձնել տէրերուն, կ՚ունենայ լուրջ դերակատարութիւն։ Այսօր թուրք- ատրպէյճանական շինծու խաղի մէջ ես կը կարծեմ թէ վատ կը կատարէ, այսպէս ըսած «աւագ եղբօր» պարտականութիւնները Ատրպէյճանի նկատմամբ։ Այսինքն Ատրպէյճանին կը մղէ արկածախնդրութեան, ըսելով թէ «Ինչ որ կ՚ուզես ըրէ, ես կողքիդ եմ»։ Մինչդեռ, ընդհակառակը, պէտք էր «եղբօրը» ետ պահեր կործանումէն։
Ատրպէյճանի նախագահը ըսեր է թէ «չեմ կրնար գտնել արտգործնախարարը եւ մի նայիք քայլողներուն, զինուոր չեմ կրնար գտնել»։ Այս արտայայտութիւնը ինչպիսի՞ քաօս մը կ՚արտացոլացնէ։
Ատրպէյճանի նախագահի այս անկեղծ յայտարարութիւնը իմ մէջ կ՚առաջացնէր կարեկցանք, տուեալ երկրի ղեկավարի հանդէպ։ Այս արտայայտութիւնները արտացոլումն են, եւ պտուղներն են արժան ամբոխավար քաղաքականութեան։ Այո՝ պետութեան հզօրութիւնը միայն նաւթատոլարները չեն։ Բանակի հզօրութիւնը միայն թեխնիկական զինուածութեան մէջ չէ, այլ բանակի եւ աշխարհազորի ոգին։ Յարձակող բանակը միշտ աւելի թոյլ է, քան իր հողն ու տունը պաշտպանող ժողովուրդը։
Թէեւ բախումը տեղի չունեցաւ Ղարապաղի շրջանը, Պաքուի մէջ ժողովուրդը քայլերթի դիմեց Ղարաբաղի համար։
Ղարաբաղի ժողովուրդը վաղուց արդէն կայացրած է իր որոշումը եւ հռչակել ինքնիշխան պետութիւն։ Այս փաստի հետ պէտք է հաշուի նստիլ։ Այդ 30 տարիներու մէջ այնպիսի փորձութիւններով է անցած որ, ետ չի կանգնիր այդ ճանապարհէն։ Ամենակարեւորը՝ այդ 30 տարիներուն միայն ատելութեան եւ միմիանց ոչնչացնելու սերմեր ցանուած են։ Կը կարծեմ թէ նախ պէտք է երկկողմ ետ գնանք այն կէտին, որուն որ հասած ենք։ Փաստօրէն Ատրպէյճանը չուզեր այս փաստերու հետ հաշուի նստիլ։ Իր Ժողովուրդը կը կերարկէ ռազմատենչ յայտարարութիւններով, Հայաստանի ու ատրպէյճանի սահմանին սադրանքներ եւ բախումներ հրահրելով։ Նոյնիսկ դպրոցներէ ներս երեխաներուն կը քարոզեն ատելութիւն ու թշնամանք։ Պէտք է կանգ առնել, այս բոլորին համար յետոյ շատ թանկ կը վճարենք։ Տասնամեակներ, մի գուցէ հարիւրամեակներ պիտի սպասենք որպէսզի բան մը շտկուի։ Ճանաչուի Ղարաբաղի անկախութիւնը, այսինքն ընդունուի պատմական փաստը եւ յետոյ մտածենք մնացեալի մասին։ Այդ ոչ պակաս մնացած խնդիրներու լուծման համար պէտք է փոխադարձ վստահութեան հաստատումը։ Կը ցաւիմ որ Թուրքիոյ քաղաքացիական հասարակութիւնը տեղեկացուած է միակողմ տեղեկութիւնով։ Մինչ մենք պատրաստ ենք իրազեկել անկողմնակալ իրավիճակը եւ փաստերը Ղարաբաղի հարցի շուրջ։