Սուրբ Սոֆեայի տաճարի թանգարանի համակարգէն դուրս գալով մզկիթի վերածուելու որոշումէն ետք Բիւզանդական պատմական եկեղեցի մը եւս կը բաժնէ նոյն ճակատագիրը։ Զ. դարէն մնացած Քորա (Քարիյէ) եկեղեցին Իսթանպուի գրաւումէն ետք 1511 թուին մզկիթի վերածուած էր։ Այս մզկիթն ալ 1945 թուին Սուրբ Սոֆեայի նման Նախարարաց Խորհուրդի որոշումով թանգարանի վերածուեցաւ։ Այդ թուականէն ետք վերաշինութեան շատ լուրջ աշխատանք տարուած էր, յատկապէս պատերու ծեփով ծածկուած խճանկարները եւ որմնանկարները երեւան հանելու համար։ 1320-ական թուականներուն Թէոտորոս Մեթոհիտեսի պատուէրով նախշուած սրբանկարները ամենացայտուն օրինակները կը համարուին բիւզանդական արուեստի։ Այդ նկարներուն մէջ կ՚արտացոլուի քրիստոնէական պատմութիւնը ժամանակագրական հետեւողականութեամբ։
Թանգարանը կրկին անգամ մզկիթի վերածելու մասին որոշումը կայացած էր Խորհրդակցական Ատեանի 19-րդ բաժնի որոշումով 2019 թուին։ Ինչպէս Սուրբ Սոֆեայի օրինակը այս որոշումին ալ գործադրութիւնը բողոքի ձայներու պատճառ դարձաւ։ Քաղաքի այդ հատուածին մէջ ալ բաւականին շատ են գործող մզկիթները եւ այս որոշումները ո՛չ թէ կարեկցանքի մը հետեւանքով, այլ պարզապէս կրօնական ոխի մը դրսեւորում ըլլալով մզկիթի կը վերածուին։
Երկու տաճարներն ալ Իսթանպուլ այցելող զբօսաշրջիկներու ամենաշատ այցելած վայրերու կարգին են։