Երբ Թուրքիա կը պատրաստուի թեւակոխել նոր տարի մը, տնտեսական ալեկոծումներով հրահրուած առօրեային վրայ այս անգամ ալ եկած է կուտակուելու քաղաքական սրուածութեան մթնոլորտը։ Դրամատուներու միջեւ վերահսկողութեան կառոյցը դատախազութեան դիմում կատարելով պատիժ պահանջեց կարգ մը տիտեսագէտներու եւ տնտեսագիտական վերլուծաբաններու դէմ։ Կառոյցը իր բողոքագրին մէջ կը նշէ թէ ցանկագրեալ անձերը իրենց մեկնաբանութիւններով հասարակութեան մէջ խուճապ ստեղծած եւ տնտեսական անկայունութեան պատճառ դարձած են։ Միւս կորղմէ Արդարադատական Նախարարութեան ալ դիմում կատարուած է, որպէսզի դատավարութեան արտօնութիւն տրուի՝ այն ՀՏՓ-ականներուն դէմ, որոնք 1915-ի դէպքերը բնութագրած են իբրեւ ցեղասպանութիւն։
Յիշենք որ մօտ անցեալին նման մեղադրանքով բարձր տուգանքի ենթարկուած էր «»ԹԵԼԷ 1» հեռուստակայանը, հաղորդումի մասնակիցներէն մէկուն ուղիղ եթերի ընթացքին Նախագահ Էրտողանին հասցէին «Տիքտաթէօր» կոչելուն համար։
Յայտնի իրողութիւն է, որ նախագահ Էրտողան համաշխարհային քաղաքական դաշտի վրայ համատարած կերպով արժանացած է այդ կոչումին։ Նոյնպէս 1915-ի դէպքերը համամշխարհային գետնի վրայ անվիճելի կերպով «ցեղասպանութիւն» կը կոչուին։ Ուրեմն Թուրքիոյ մէջ պատիժ կը սահմանուի տիքտաթէօրին տիքտաթէօր ըսողներուն կամ ցեղասպանութիւնը փաստացի իրողութիւն մը ըլլալով հասատատողներուն դէմ։
Վերջերս հալածանքի սլաքները ուղղուած են Իսթանպուլի Մայր Քաղաքապետ Էքրեմ Իմամօղլուին։ Նախ Ներքին Գործոց Նախարարը եւ ապա Հանրապետութեան Նախագահը Իմամօղլուն կը մեղադրեն իբրեւ թէ քաղաքապետարանի անձնակազմին մէջ ահաբեկիչներ պաշտօնակոչելուն համար։
Միւս կողմէ դատարանը անգամ մը եւս մերժած է հանրածանօթ հասարակական գործիչ Օսման Քաւալայի ազատ արձակումը։ Նմանապէս հերթական անգամ մերժուած է նախկին երեսփոխան, այժմ բանտի պայմաններու մէջ ալզայմեր հիւանդութենէն տառապող Այսել Թուղլուքը ազատ արձակելու կոչերը։
Իսկ 28 Դեկտեմբեր երեքշաբթի օր ՀՏՓ կուսակցութեան Պահչելիէվլերի մասնաճիւղը կրկին անգամ յարձակումի թիրախ դարձաւ։ Բարեբախտաբար այս յարձակումը նախապէս Իզմիրի մէջ կատարուածին նման արիւնալի չեղաւ եւ կուսակցականներ միջամտելով չէզոքացուցին յարձակող անձը եւ յանձնեցին ոստիկանութեան։
Ահաւասիկ քանի մը օրինակներ, որոնց քննարկումը յաջորդ տարի ալ պիտի տառապեցնէ շատերու խիղճերը։
