Բանաստեղծ Ահմետ Չաքմաք 8 Նոյեմբերին Ամիտայի պատմական պարիսպներու Քեչի Պուրճու հատուածին մէջ ցուցադրեց Տիգրանակերտ քաղաքի վերաբերեալ պարբերականներէն բաղկացող իր հաւաքածոն։ Տիգրանակերտ եւ զանազան այլ քաղաքներու մէջ լոյս տեսած պարբերականները առհասարակ մշակոյթի եւ արուեստի հանդէսներ են։ Օսմանեան շրջանէն մինչեւ մեր օրերուն հասնող այդ ծաւալուն հաւաքածոյի ջախջախիչ մեծամասնութիւնը կը կազմեն բնօրինակներ, որոնք 15 տարիներու յամառ, քրտնաջան եւ բազմածախս աշխատանքի հետեւանքով մէկտեղուած են։ Այն նմոյշները ի մի բերուած են տարբեր քաղաքներու գրադարաններէն, հնավաճառներէն եւ մտաւորականներու արխիւներէն։
Չաքմաք կը յայտնէ թէ այս պարբերականները Օսմանեան կայսրութեան բազմալեզու յատկութիւնը ցուցադրող նմոյշներ են։ Արդարեւ պարբերականներու մէկ մասը 1915-էն ետք հրատարակուած են հայկական գաղթօճախներու մէջ։ Ան այսպէսով օրինակ կը բերէ հայալեզու պարբերականներէն «Տիքրիս»ը 1918-ին Նիւ Եորք, «Նոր Տիգրանակերտ»ը 1918 Պրուքլին, «Նոր Չինկուշ» 1931 Նիւ Եորք պարբերականները։
Տիգրանակերտի մէջ նախապէս լոյս տեսնող հայերէն, թրքերէն, քրտերէն, ասորերէն պարբերականներու փոխարէն Հանրապետութեան շրջանին ընդհանրապէս թրքերէն, իսկ 1990-ականներէն ետք ալ քրտերէն եւ թրքերէն ըլլալով լոյս տեսած են։
Ցուցահանդէսը բաց պիտի մնայ մինչեւ 27 Նոյեմբեր եւ եթէ ցանկութիւն ըլլայ պիտի ցուցադրուի նաեւ, այլ երկիրներու մէջ։
