Իտալական գրականութեան մէջ շատ յատկանշական երկու կերպարներ են Տոն Գամիլլօ եւ Փեփոնէ։ Անոնց շունչ տուողը եղաւ երգիծաբան Գուարէշի։ Իտալացիք այդ երկու անուններուն ծանօթացան թերթի մը ամանորեայ յաւելուածի էջերէն։ Յերիւրածոյ այդ կերպարները այնքան հարազատօրէն կը նկարագրէին որ իտալացիներու այդ տարիներու ընկերային հակադրանքը, ընթերցողներու հետաքրքրութեամբ գոյացաւ պատմուածքներու երկարատեւ շարան մը։
Տոն Գամիլլօ իբրեւ քաղաքի մեծագոյն եկեղեցւոյ հոգեւոր հովիւ կը ներկայացնէր աջակողմեան պահպանողական ճակատը։ Իսկ Իտալոյ Կոմունիստ Կուսակցութեան անդամ Փեփոնէ նոյն քաղաքի քաղաքապետն էր։ Ընդմիշտ կը պայքարէին իրարու դէմ, բայց համակարգն ալ կ՚ամբողջանար այդ երկուքի կռիւներով։ Այդ առումով իրարու կարօտ էին։
Նախորդ շաբաթ ջիղերս չեզոքացուցի եւ համբերութեամբ ընթերցեցի Սուրբ Փրկիչ Հիւանդանոցի հոգաբարձութեան ատենապետի եւ Գարակէօզեան Տան խնամակալութեան ատենապետի փոխադարձաբար իրար խոշտանգող գրութիւնները։
Գրութիւններու մեկնակէտը բամբասանք եւ մատնութիւնն էր։ Այդ աղմուկէն օգուտ ակնկալողներ կողմերը տեղեակ պահած էին իրարու հանդէպ կատարուած մեղադրանքներէն եւ ինչպէս կը պատահի միշտ կայծը վերածուած էր հրդեհի ու համայնքի անուանի երկու բարերարները այլեւս հաւանաբար պիտի չհանդուրժեն իրարու երես տեսնելու։
Այդ գրութիւններու շարունակութեան համբերութեամբ կարդացի նաեւ բազմաթիւ մեկնաբանութիւններ։ Ինձ նման համբերութեամբ կարդացողները կ՚ափսոսային որպէս համայնքի վարիչներ ներկայացող մարդկանց մատնուած մակարդակի անկումին։ Այս առումով ցաւալի էին գրուածները եւ ճիշդ էին մակարդակի անկումի մասին մտահոգութիւնները։ Բայց արդեօք մեր նիւթը միայն այդ գրութիւններու հեղինակով սահմանուած է։ Չարժէ՞ր անգամ մըն ալ քննարկել իրենց այդ տիտղոսները շնորհող համայնքին մակարդակը։ Եթէ խնդիրը դիտենք այս երեսակով ինքնաբերաբար պիտի խօսինք Պատրիարքարանէն սկսեալ մեր բոլոր հասարակական կազմակերպութիւններու մակարդակի սնանկացման մասին։ Յիշենք որ այս անձերը միշտ նոյն մակարդակին էին։ Պարզապէս իրենց նուիրատուի հանգամանով կ՚անտեսուէր այդ անմակարդակ ոճը եւ անոնք պատիւներու կ՚արժանանային ամենուրէք։ Ոչ թէ այսօրուայ, այլ աւելի քան երեք դարերու մաշուածութեան մը ցոլացումն է պարզուածը։ Միշտ սիրեցինք բարերարներու գոյութիւնը՝ քանի որ այսպէսով ձերբազատուեցանք մեզմէ ակնկալուած ծանր բեռը տանելէ։ Հետաքրքրական է տեսնել թէ վերջին երեք դարերու ընթացքին սկսած Օսմանեան Կայսրութեան շրջանի ամիրաներէն լումայափոխներն են որ կ՚իշխեն այս համայնքի վրայ իրենց փառք ու պատիւը գտնելով բարերարութիւն կոչուած արարքէն։ Հայ իրողութեան մէջ ճիշդ է որ բարերարութիւնը ունեցած է շատ կարեւոր նշանակութիւն սկսելով Գալուստ Կիւլպէնկեանէ կամ Մանթաշեանէ մինչեւ Մելքոնեան եղբայրներ եւ ուրիշներ։ Բայց պարտաւոր ենք գործին հանդիպակած կողմն ալ տեսնելու։ Իրականութեան մէջ ինչեր զոհեցինք յանուն բարերարներու իշխանութեան։ Վերջապէս այդ միջոցաւ մեր համայնքին մէջ գոյացաւ օրինականութիւնը զանց առնելով խնդիրները բարեկամական միջնորդութիւններով լուծելու եղանակ մը։ Այդ եղանակի վերջին օրինակը ըլլալ կ՚երեւի համայնքային հաստատութիւններու ընտրութենէն խուսափելու եղանակները։
Անիմաստ է ի զուր տեղ բողոքելը։ Այս մեր մակարդակն է, որուն մէջ իւրաքանչիւրս ունինք մեր պատասխանատուութեան բաժինը։