Մօտ չորս տարի է որ, անհիմն մեղադրանքներով բանտարկութեան մատնուած Օսման Քաւալա։ Նախագահ Էրտողանի իր հասցէին ուղղած «Սորոսի աւելցուկ» նախատինքէն ետք իր ցասումը յայտնելով յայտարարեց թէ յետ այսու պիտի չմասնակցի դատական նիստերուն։ «Արդար դատավարութեան մը հաւանականութիւնը բոլորովին վերացած է։ Այս պայմաններու տակ անիմաստ կը գտնեմ դատական նիստերու մասնակցելով ինքնապաշտպանութիւն ներկայացնելը» ըսաւ Օսման Քաւալա։
Ան յայտնեց որ երկրէ ներս հասարակական կազմակերպութիւններու թափանցիկ կերպով աջակցելու համար եւ օրէնքներու թոյլատրած եղանակներով հիմնուած Բաց Հասարակութեան Հիմնարկի վարչութեան մէջ ինք ալ պաշտօն ստանձնած էր։ «Այդ հիմնարկի նախագահութիւնը երբեք չեմ ստանձնած։ Ոչ հիմնարկը, ոչ ալ Ճորճ Սորոսը ներկայացնող դիրքի մը մէջ եղած եմ։ Սորոսի Թուրքիա այցելութիւններու ընթացքին հիմնակրի միւս վարչայիններուն հետ միասին ես ալ ժողովներուն ներկայ գտնուած եմ։ Այդ ժողովները մեր հիմնարկի գործունէութիւններուն մաս կը կազմէին։ Որքան որ գիտեմ յարգելի Էրտողան խնդրոյ առարկայ հիմնարկի հիմնադրութենէն աւելի կանուխ թուակնի մը ծանօթացած է Սորոսի հետ։ Սորոսի վերջին այցելութիւնը կայացած էր 2015-ի Նոյեմբերին։ Այդ տարիներուն ալ Արդարութիւն եւ Զարգացում Կուսակցութեան անդամ քաղաքական գործիչներու եւ նախագահ Էրտողանի խորհրդատուներու երկխօսութիւնը շարունակուած է։ Ես այդ հանդիպումներուն ներկայ չեմ գտնուած եւ արծարծուած նիւթերէն ալ տեղեակ չեմ։ Ինծի վերագրուած մեղադրանքները փաստերէ զուրկ ըլլալով հանդերձ չորս տարի է որ ճաղերու ետին ձերբակալուած կը մնամ։ Նախագահին տակաւին չդատապարտուած եւ դատավարութիւնը շարունակուող մէկու մը հասցէին նուաստացուցիչ եւ նախատական խօսքերը արժանապատութանս յարձակում կը համարեմ։ Այդ ելոյթները կը միտին դատակազմի վրայ ազդեցութիւն գործելու։ Այս պայմաններու մէջ, քանի որ արդար դատավարութիւն մը անկարելի դարձած է, համոզուած եմ որ անիմաստ է դատական նիստերու մասնակցիլ եւ ինքնապաշտպանութիւն ներկայացնել։ Օրինական պետութիւն պաշտպանող քաղաքացի որպէս արդարադատութեան ենթարկուած այս իրավիճակը օրինականացնելէ հեռու պիտի մնամ»։