Այս տարուայ Նոպելեան մրցանակի բժշկագիտական դափնեկիրներն էին փրոֆէօմորներ Արտեմ Փաթափութեան եւ Տէյվիտ Ճուլիուս։
Կեդրոնական վարժարանի գիտութեան ակումբը երկու գիտնականները ծանօթացնելու եւ անոնց Նոպելի մրցանակը նուաճելուն պատճառ դարձած գիտական հետազօտութիւնը ծանօթացնելու համար 27 Հոկտեմբեր չորեքշաբթի բանախօսութիւն մը կազմակերպեց վարժարանի սրահին մէջ։
Այստեղ գիտական ակումբի անդամ աշակերտները ծանօթացուցին 1967-ին հաճընցի եւ Շեպին Գարահիսարցի արմատներէ սերած Արտեմ Փաթափութեանը։ Մայրը Հայկուհի Աճեմեան նախակրթարանի տնօրէն է եւ ուսուցիչ։ Իսկ Հայրը Սարգիս Փաթափութեան գրող եւ հաշուակալ։ Քոյրը Հուրի Փաթափութեան ճարտարապետ է եւ անգլերէնի ուսուցիչ։ Իսկ եղբայրը Արա Փաթափութեան համակարգչի մասնագէտ է եւ աւելի քան 30 գիւտերու հեղինակ։
Արտեմ Փաթափութեան յաճախած է Պէյրութի Տեմիրճեան եւ Յովակիմեան-Մանուկեան վարժարանները։
Քաղաքացիական պատերազմի տարիներուն Փաթափութեաններու ընտանիքը պարտադրաբար գաղթած են ԱՄՆ։
1990 թուին Արտեմ Փաթափութեան կ՚աւարտէ Լոս Անճէլըսի Գալիֆորնիա Համալսարանը մասնագիտանալով բջիջային կենսագիտութեան մէջ։
2000-2014 թուականներուն իր ակադէմական զարգացումը կը շարունակէ «Սքրիփս» Հետազօտութիւններու Ինստուտուտի եւ «Նովարդիս» հետազօտութիւններու հիմնարկի երդիկին տակ։ Նոպելի մրցանակը նուաճելուն պատճառ դարձած է իր յայտնաբերած մոլեքիւլները, որոնք ջերմութեան եւ ճնշումի նման ազդեցութիւնները ընկալող յատկութիւն ունին եւ անուանուած են «Փիեզօ1» եւ «Փիեզօ2» կոչումով։
Փաթաթութեանի հետ նոյն մրցանակը կիսող Տէյվիտ Ճուլիուս ալ գտած է ջերմութեան զգայուն TRPV1 ընկալուչը։ Այս ընկալուչի յայտնաբերումը եւ գործելու եղանակին գիւտը յարատեւ ցաւերու կանխման առումով մեծ նշանակութիւն ունի։ Ան նաեւ պիտի նպաստէ բազմաթիւ հիւանդութիւններու բուժման ծառայող դեղամիջոցներու զարգացման։
Ընտանեկան եւ աշխատանքային միջավայրէն զանազան լուսանկարներով ճոխացած զեկոյցի ընթացքին արտասանուեցաւ նաեւ Արտեմ Փաթափութեանի մրցանակատուչութեան արտասանած ճառախօսութիւնը։
«18 տարեկանիս ԱՄՆ եկած լիբանանցի գաղթական մը ըլլալով նոյնիսկ չէի կրնար երազել թէ գիտութեան ձօնուած կեանք մը պիտի ունենամ։ Մանկութեան եւ պատանութեան տարիները պատերազմի պայմաններու մէջ անցած մէկը ըլլալով կեանքը միշտ լուրջի առած եմ։ Իբրեւ գիտնական այս պահուն ես զիս բաւական եզակի կը զգամ եւ երախտապարտութեամբ կ՚ընդունիմ այս մրցանակը»։
Միջոցառումը նոյն գիշեր ժամը 21.00 առցանց դրութեամբ կը ներկայացուի նաեւ հասարակութեան։
