13Նոյեմբերին Իսթիքլալ պողոտայի վրայ պայթած ռումբի պատրուակով Թուրքիոյ օդային ուժերը ծանր ռմբակոծումներ կատարած են Իրաքի եւ մանաւանդ ալ Սուրիոյ հիւսիս արեւելեան քրտաբնակ շրջաններու վրայ։
Ռմբակոծումները, որ առաջին օր ուղղուած էին 89 կէտերու, իրենց թիրախ ընտրած են քաղաքացիական նշաւակներ։ Քրտական աղբիւրները մանրամասնութիւններով կը ներկայացնեն քաղաքացիական զոհերու մասին։
Կասկած չկայ թէ տեղացի ժողովուրդը անգամ մը եւս զոհը կը դառնայ համաշխարհային դաւադրութեան մը։ Նախ նշենք որ թրքական կործանիչներու ռմբակոծած օդային տարածքը ամբողջովին ռուսական ուժերու հսկողութեան տակ կը գտնուի։ Ուրեմն պարզ է որ Էրտողանի կառավարութիւնը յարձակումի նախօրեակին յօժարութիւն ստացած է իր դաշնակիցէն։ Արեւմտեան աշխարհն ալ յարձակումը մեկնաբանած է «Թուրքիոյ իր երկրի անվտանգութիւնը ապահովելու իրաւունք»ով։ Հետզհետէ սովորական դարձած պատճառաբանութիւն մը, որու միակ երաշխաւորն է Թուրքիոյ կառավարութիւնը։ Ցարդ հարաւային սահմանէն ուղղակիօրէն Թուրքիոյ սպառնացող ոչ մէկ յարձակում գրանցուած է։ Այս գիտնալով հանդերձ Թուրքիոյ պետութեան նման պատճառաբանութիւնը կրկնելը միայն մէկ բացատրութիւն ունի, որն է արեւմուտքի անվստահելիութիւնը։
Ոչ ոքի համար գաղտնիք է թէ 13 Նոյեմբերի հեղինակը անյայտ ահաբեկչական արարքը Թուրքիոյ համար պատրուակ մը ըլլալով շահագործուած է։ Զարմանալի է (կամ ալ չէ) տեսնել թէ երկրէ ներս իբրեւ ընդդիմադիր ներկայացող ազգայնական բոլոր կուսակցութիւնները, բացառութեամբ ՀՏՓ-ի ողջունած են այս յարձակումը, նոյնիսկ գորշ գայլերու կուսակցութիւնը կատարուածը անբաւարար համարելով պահանջած է ցամաքային ուժերով ալ ներթափանցել դէպի Սուրիոյ քրտաբնակ վայրերը։
Արդարեւ նախագահ Էրտողան Գաթարէ վերադարձին նախագահական ինքնաթիռի մէջ յայտարարած էր թէ մտադիր են սկսած յարձակումը ցամաքային ուժերու ներթափանցումով աւարտին հասցնել։
Սակայն այս վերջին հակումը մերժուած է թէ Ռուսիոյ Դաշնութեան եւ թէ ԱՄՆ-ի իշխանութիւններու կողմէ։
Ահաբեկչական յարձակումը եւ կործանիչ ինքնաթիռներու ռմբակոծութիւնները կը յիշեցնեն, այն վարկածը ըստ որ հարցախոյզներու ընթացքին օրըստօրէ տկարացող իշխանութիւնը ընտրութիւնները չեղարկելու կամ եթէ պիտի կայանան ազգայնական գրգռութիւններով իր շարքերը ամրապնդելու ռազմավարութեան մասին։ Այդ շրջանակները կը յիշեցնէին 2015 թուին 7 Յունիս եւ 1 Նոյեմբեր թուականներուն կայացող ընտրութիւնները։ Այդ ժամանակ ալ Էրտողան 7 Յունիսին իր պարտութիւնով աւարտած ընտրութիւնները մերժած էր եւ 1 Նոյեմբերին կրկնուած ընտրութիւններով ալ վերստին ապահոված առանձին կառավարութիւն կազմելու համար անհրաժեշտ ձայները։
Մտահոգիչ է պարզուած պատկերը, քանի որ սկսած են ղօղանջել պատերազմ ազդարարող զանգակները։
Այս բոլորը կը պատահին այն օրերուն, երբ Հայաստանի մէջ ալ կը գումարուի Միացեալ Ապահովութեան Դաշինքի գագաթաժողով մը։ Աշխարհի բոլոր խաղաղ բնակիչները նոյն ու նման դաւադրութեան մը հետ դէմ յանդիման են եւ իւրաքանչիւրը մեծ հիասթափութեան մէջ կը փորձեն իրենց ելքի միջոցները որոնել։
Կարծես պահը եկած է տուժածներու դաշինքով մը համաշխարհային անհնազանդութեան փողը հնչեցնելու։
pakrates@yahoo.com