Եկած է ամառուայ արձակուրդի ամիսները։ Յատկապէս հիւսիսային կիսագունդի վրայ զանազան երկիրներու բնակիչներ ամառուայ ամիսներուն հայաստանեան բարբառով եթէ ըսենք. «հանգստանալու» մարմաջով կը լքեն իրենց բնակարանները եւ կը ճամբորդեն զանազան վայրեր։ Ոմանք կը նախընտրեն ծովափեայ քաղաքներ, ուր կարելի է ծովու ընծայած բարիքներէն օգտուիլ։
Ուրիշներ այդքան ալ հաշտ չեն արեւի ճառագայթներու տակ մրրիլ ու կարմրիլէ, եւ ապա այդ շոգիներ արձակող մարմինը ծովու պաղ ջուրերուն մէջ սարսռացնելու խորհուրդէն։
Այդ տեսակներու համար ամառը կը նշանակէ նաեւ դէպի լեռնադաշտեր ժամանակաւոր գաղթի մը եղանակը։ Հոն եւս առօրեան բոլորովին տարբեր է ամբողջ տարի մը մատնուած ապրումներէ։ Օդը ջինջ ու մաքուր է, ջուլը զուլալ եւ ամենուրէք կը տիրէ խաղաղութիւն։
Ոմանք ամառուայ արձակուրդը կ՚օգտագործեն նոր երկիրներ, նոր քաղաքներ, վերջապէս նոր ապրումներ փորձելու համար։
Կան արկածախնդրութեան սիրահարներ, որոնք այն ինչ որ չէին ըրած իրենց անմիջական շրջանակին մէջ, հիմա գտած են այդ բոլոր գրաւիչ բաներէ անմասն չմնալու առիթը։
Իմ վաղ երիտասարդութեան տարիներուն Եւրոպայի որոշ մէկ հատուածի համար ամենագրաւիչ ճանապարհորդութիւնը կը սկսէր Եւրոպայի ցանկացած մէկ քաղաքէն ու կ՚աւարտէր Քաթմանտու։
Խմբագրատան մէջ ալ օրերու թելադրած նիւթը արձակուրդի վայրերն է։ Մեր մօտ ծովային հանգստութեան համազօր հետաքրքրութիւն կը գոյանայ, երբ կը խօսինք պատմամշակութային նշանակութիւն ունեցող վայրերու մասին։
Հայաստանցին Անթալիա գացեր է։ Գընալըի այսինչեանները այս տարի ալ Պոտրում գացեր են։ «Մենք երկար արձակուրդ չենք կրնար ընել, հետեւաբար շաբաթավերջին Յունաստան կ՚երթանք քանի մը անգամ» ըսողներու փոխարէն «Կիպրոս կ՚երթանք, չէ որ խաղալը կը սիրենք» ըսող բարեկամներ ալ ունիմ։
Ըսած էինք որ խօսքը կը վերաբերի կիսագունդի հիւսիսային հատուածին։ Ուրեմն բազմամիլիոն մարդու տանջն է ամառնային արձակուրդը։ Անոնց հետ միասին զբօսաշրջական ընկերութիւններու անձնակազմը, օդային, ծովային եւ ցամաքային փոխադրութեան միջոցները եւ իրենց հետ միասին սպասարկման, ծառայողական ոլորտի նոյնքան մարդիկ տեղաշարժի մէջ են։
Մեր նախասիրութեան սլաքները այս անգամ ուղուած է երկրի հարաւ արեւելեան շրջանները։ Պիտի այցելենք Մարտին, Տիյարպեքիր եւ Տէրսիմ։ Կրկին յուզումներու պիտի մատնուինք Սուրբ Կիրակոսի կամարներուն ներքեւ։ Ախորժաբեր պահեր պիտի ապրինք Տաղգաբը թաղին մէջ թոքի խորոված համտեսելով։ Բայց բոլորէն աւելի գրաւիչ է ծանօթանալ տեղւոյն հայ համայնքին հետ, քանի որ կիսելու ահագին նիւթեր ունինք մեր մտքին մէջ։
Բնականաբար կ՚աճապարենք, այս մեր գոնէ ժամանակաւորապէս վերջին աշխատանքային օրն է։ Վրայ կը հասնի պայրամի արձակուրդը եւ «Ակօս» լոյս չի տեսներ յաջորդ շաբաթ։
Մենք թեթեւցած կ՚երեւինք, բարի արձակուրդ նաեւ ձեզ։
pakrates@yahoo.com