Հանրապետութեան հռչակման 100-ամեակին առթիւ քաղաքիս մէջ 28 Հոկտեմբեր 2023, Շաբաթ, ժամը 20.00-ին Ոսկեղջիւրի Րիքսոս Թէրսանէ սրահին կայացաւ Իսթանպուլի Կուսակալ Տավուտ Կիւլի սարքած շնորհաւորական ընդունելութիւնը։ Ն.Ա.Տ. Սահակ Բ. Պատրիարք Հայրը, իր կողքին ունենալով Պատրիարքական Փոխանորդ Արժ. Տ. Գրիգոր Աւ. Քհնյ. Տամատեանը, մասնակցեցաւ սոյն ընդունելութեան եւ շնորհաւորեց Մեծայարգ Կուսակալը։
Իսկ 29 Հոկտեմբեր 2023, Կիրակի, ժամը 9.30-ին Կուսակալութեան մէջ սարքուած պաշտօնական շնորհաւորական ընդունելութեան յանուն Պատրիարքական Աթոռի մասնակցեցան Աթոռանիստ Մայր Եկեղեցւոյ Թաղային Խորհուրդի Ատենապետ՝ Հրանդ Մոսկոֆեան եւ անդամներէն՝ Մինաս Արսլան։
Ն.Ա.Տ. Սահակ Բ. Պատրիարք Հայրը, Կիրակի առաւօտ, իր կողքին ունենալով Արժ. Տ. Գրիգոր Աւագ Քահանան, ժամը 10.00-ին օդային ճամբով մեկնեցաւ Անգարա եւ 12.30-ին Պէշթէփէյի Նախագահական Պալատի մէջ շնորհաւորեց Հանրապետութեան Նախագահ՝ Վսեմաշուք Րէճէպ Թայյիպ Էրտօղանը։ Սոյն ընդունելութեան ներկայ էին նաեւ Յունաց Բարթողիմէոս Տիեզերական Պատրիարքը, Հրէից Րաբունապետ՝ Րավ Իզաք Հալէվա, Ասորի Ուղղափառաց Պատրիարքական Փոխանորդ Մոր Ֆիլիւքսինոս Եուսուֆ Չէթին Մետրոպոլիտ։ Հայ համայնքէն ներկայ էին Ս. Փրկիչ Ազգային Հիւանդանոցի Հոգաբարձութեան Ատենապետ՝ Պետրոս Շիրինօղլու, Գարակէօզեան Տան Խնամակալութեան Ատենապետ՝ Տիգրան Կիւլմէզկիլ, Ժամանակ Օրաթերթի Աւագ Խմբագիր՝ Արա Գոչունեան։
Ընդունելութեան մասնակից հոգեւորականներ ժամը 15.00-ին Հանրապետութեան Նախագահի մասնաւոր օդանաւով Իսթանպուլ հասան եւ ուղղուեցան Վոսփորի Արեւելեան ափին՝ Վահտէտտինի Ապարանքի պարտէզը ու մասնակցեցան պաշտօնական հիւրերու ներկայութեամբ սարքուած հանդէսին, որու ընթացքին ներկաներ հետեւեցան Ծովային Ուժերու Հրամանատարութեան ենթակայ նաւատորմէն 100 մարտանաւերու շքերթին, նաեւ օդային ուժերու սաւառնակներու հանդիսաւոր թռիչքներուն։
Բաց աստի մեր Հոգեւոր Պետը գրաւոր շնորհաւորական մը ուղարկեց Հանրապետութեան Վսեմաշուք Նախագահին եւ յանուն հայ համայնքին բարեմաղթութիւններ յղեց օրուան տօնին առիթով։