Հայաստանի Հանրապետութեան Սփիւռքի Նախարարութեան ջանքերով կազմակերպուած «Երգում ենք Կոմիտաս» փառատօնին մասնակցելու համար Պոլսոյ Սայաթ Նովա երգչախումբը մեկնած էր Երեւան։ 25-28 Սեպտեմբեր թուականներու միջեւ կայացած միջոցառումը կայացաւ Երեւանի ու Կիւմրիի մէջ։ Փառատօնին մասնակցութիւն բերած էին Իրան, Յորդանան, Լիբանան, Ռուսիա եւ այլ երկիրներէ եկած անհատական կամ խմբային կազմեր։ Միջոցառումը Սայաթ Նովա երգչախումբի երկրորդ այցելութիւնն էր դէպի Հայաստան։ Նախապէս 2008-ին խումբը հանրածանօթ «Քարտէշ Թիւրքիւլեր» երաժշտական խումբի ընկերակցութեամբ այցելած էր Հայաստան եւ այնտեղ «Աշուղ է եկեր մեր մայլէն» խորագրեալ նախագիծով ոգեւորել էր Հայաստանի հանդիսատեսին։
Սայաթ Նովա երգչախումի խմբավար Մելիքճան Զաման այս հիւրահամերգի հետ կապուած իր տպաւորութիւնները հետեւեալ կերպով ներկայացուց «Ակօս»ին։ «Մենք նախ եւ առաջ կարեւորած ենք Կամիտասի անունը կրող միջոցառումի մը մասնակից ըլլալու հրամայականը։ Կոմիտաս իր երաժշտական բարձր տաղանդի կողքին տակաւին զանազան յատկութիւններով մեզի համար սրբութիւն մը դարձած է եւ մենք երբեք չենք կրնար անտարբեր մնալ Կոմիտասի անունը կրող որեւէ միջոցառումի հանդէպ։ Մնաց որ այս տեսակի միջոցառումները շաղկապ մը կը գոյացնեն աշխարհով մէկ տարածուած սփիւռքահայութեան եւ Հայաստանի երաժիշտներու միջեւ։ Մենք միշտ մեծ ոգեւորութեամբ եկած ենք Հայաստան։ Մանաւանդ ալ մայրաքաղաքէ դուրս կատարուած համերգները ալ աւելի խոր կը տպաւորեն մեզ։ Անցեալին այցելած էինք Վանաձոր, իսկ այս անգամ առիթը ունեցանք Կիւմրիի մէջ համերգ սարգելու։ Այստեղ մեր կատարած աշխատութեամբ նոր աւիւն կը ստանանք։ Անշուշտ որ ապրած երկրի մէջ կը շնչենք հայ երաժշտութիւնով, բայց այնտեղ զուրկ ենք այդ մշակոյթին մէջ ապրելու կարողութենէն։ Հաճելի է մեր փորձութիւնները հայրենի երկրի արուեստագէտներուն հետ կիսել։ Ամէն անգամ, որ կ՚այցելենք Հայաստան երաժշտական նոր ծանօթութիւններով հարստացած կը վերադառնանք երկիր։ Կը յուսամ որ յառաջիկայ տարիներուն ալ աւելի յաճախակի կ՚ըլլայ մեր այս այցելութիւնները դէպի մայր Հայաստան»։
