11Մայիս շաբաթ երեկոյեան իշխանամէտ «ԱԹՎ» հեռուստակայանը ուղիղ եթերով սփռեց հայ պատանիի մը կրօնափոխութեան մասին զգայացունց հաղորդում մը։ Հաղորդավարն էր յատկապէս Ռամազանի օրերուն ըրած հաղորդումներով աստղաբաշխական գումարներ դիզած Աստուածաբան Նիհատ Հաթիպօղլու։ Հաթիպօղլու ուղիղ եթերով խոստովանեցուց անչափահաս պատանին եւ հպարտութեամբ յայտարարեց, թէ ան իսլամը ընդունած է։ Խիստ վիճայարոյց այս լուրը խոր ընդվզում պատճառեց հաղորդումը դիտողներու մօտ։ Նախ եւ առաջ երախայի մայրը հերքեց հեռուստակայանի պնդումները, ըստ որու ան յօժարած է տղուն կրօնափոխ ըլլալուն։
«Ակօս»ին տուած բացատրութիւններուն մէջ երախայի մայրը հերքեց իր տեղեկացուած ըլլալու մասին պնդումները եւ յայտնեց թէ ինք հայ է ու քրիստոնեայ եւ չարտօներ որ տղան այլ կրօնք ընդունի։ Միւս կողմէ ՀՏՓ-ի պատգամաւոր Կարօ Փայլան արդէն իսկ շարժման անցած է այս ոտնձգութեան դէմ եւ դատարան դիմած երախայի եւ մօրը իրաւունքները պաշտպանելու համար։
Կատարուածը անհանգստութիւն պատճառած է նաեւ իսլամադաւան շրջանակներու մէջ, որոնք նիւթը կը դիտեն անչափահաս երախայի մը շահագործման սահմանումով։ «Ի՞նչ կը խորհէիք եթէ իսլամ ընտանիքի մը զաւակը նման շօուի միջավայրի մէջ մկրտուած ըլլար։ Արդեօք գոհացուցիչ կը գտնէի՞նք –Ընտանիքը տեղեակ է- կամ –Ընտանիքը թոյլտուութիւն ունի- բացատրութիւնները»։
