ԲԱԳՐԱՏ ԷՍԴՈՒԳԵԱՆ
Ինչպէս ծանուցած էինք թերթիս նախորդ թիւին մէջ, 30 Նոյեմբեր շաբաթ երեկոյ Կեդրոնական սանուց միութեան սրահին մէջ կայացաւ «Փրկիչ» հրատարակչատան նախաձեռնութեամբ հրատարակուած «Կոմիտասի Գերմաներէն Երգեր» եւ Ռուբէն Կալչեանի «Հայաստանի Պատմական Քարտէսները» հատորներու շնորհանդէսը։
Միութեան ատենապետ Գէորգ Պիւյիւքսիմքէշեանի բարի գալստեան ելոյթէն ետք Արեւ Կարեան ողջունեց ներկաները եւ ելոյթ ունենալու համար բարձրախօսը յանձնեց հրատարակիչ Միհրան Փրկիչի։ Միհրան Փրկիչ եւս իր կարգին գոհունակութիւն յայտնեց նախաձեռնութեան հանդէպ ցուցաբերուած ուշադրութեան համար եւ ողջունեց զոյգ հեղինակները, որոնք իրենց վաստակով եկան հարստացնելու մեր մշակութային աւանդը։ Այս կարճ ելոյթներէն ետք իրաւաբան Սարօ Պենկլիեան ստանձնեց հաղորդավարի պարտականութիւնը եւ առիթ ընձեռեց զրոյցին հեզասահ ընթացքին համար։ Տիրան Լոքմակէօզեան նախ հակիրճ կերպով պատմեց իր ուսման համար Հայաստան երթալու եւ ապա Կոմիտասի արխիւներու պահպանուած գրադարանին մէջ ուսումնասիրութիւններ ընելու ոդիսականը։ Այս հետաքրքրական աշխատութիւնը իր հետ ունեցած է բազում դժուարութիւններ, մանաւանդ ձեռագրերու վերծանման առումով։
«Երբեմն նոյն տողի վրայ գրառումներուն կէսը Եւրոպական ձայնանիշերով, իսկ կէսն ալ համբարձումեան ձայնանիշերով գրուած կ՚ըլլային։ Սակայն ինծի համար կարեւորագոյն յայտնութիւնը եղաւ Կոմիտասի ոչ հայերէն գործերը։ Յաջողեցաւ գերմաներէն երգերը եւ գործիքային կատարումները առանձնացնել եւ ահա լոյս տեսաւ այս հատորը։ Առաջին տպագրութիւնը տեղի ունեցաւ Հայաստանի մէջ հայերէն եւ գերմաներէն տարբերակներով։ Ուրախ եմ այս ուսումնասիրութեան արժանացած ուշադրութենէն։ Գերմաներէն երգերը արդէն իսկ սկսած են զանազան կատարողներու կողմէ մեկնաբանուիլ»։
Ապա բեմ բարձրացաւ Ռուբէն Կալչեան եւ ան ալ իր կարգին բացատրութիւններ տուաւ կատարած աշխատութեան մասին։ Կալչեան նախ նշեց, թէ իր այս աշխատութիւնը սիրողական հետաքրքրութեան մը հետեւանքն է, քանի որ ան որպէս ասպարէզ ելեկտրական ճարտարագէտ է եւ կապ իսկ չունի աշխարհագրութեան հետ։ «Ամէն ինչ ընթացաւ պատահականութիւններու բերմամբ։ Մանկութեան տարիներէ իսկ ինծի համար հետաքրքրական թուացած են քարտէսները։ Մեր տան պատին ունէինք հսկայ քարտէս մը, որուն դիմաց երկար ժամեր կրնայի անցնել։ Ապա տարիներ անց սկսայ աճուրդներով քարտէսներ գնելու եւ նաեւ ուսումնասիրելու աշխարհի քարտէսները ու մանաւանդ ալ անոնց վրայ Հայաստանի դիրքը։ Վերջապէս իմ ուսումնասիրածները առհասարակ Հայաստանը ցոյց տուող քարտէսներ են։ Անոնցմէ հնագոյնը բաբելոնեան կաւէ քարտէս մըն է, որուն վրայ նշուած են միայն երեք երկիրներ՝ Հայաստան, Ասորեստան եւ Բաբելոն։ Եւ ունի 2600 տարուայ անցեալ։ Մանաւանդ այս վերջին լուսաբանութիւնը պատասխան մըն էր, այն պնդումներուն, որոնք կը փորձեն հայը անհայրենիք եւ թափառական ցոյց տալու»։
Գիրքի շնորհանդէսը աւարտին հասաւ Տիրան Լոքմակէօզեանի Կոմիտասի գերմաներէն երգերուն կատարումով, որոնց ընթացքին դաշնամուրով իրեն ընկերակցեցաւ Աննա Յակոբեան Ուղուրլեան։
Լաւ ծրագրուած այս շնորհանդէսը համեստ ու փայլուն մասնակցութիւն մըն էր Կոմիտաս վարդապետի յիշատակման ձօնուած բազմաթիւ միջոցառումներու։