Պետական պաշտօնեաներու դատուած Հրանդ Տինքի ոճիրի դատավարութիւնը շարունակուեցաւ 18, 19 եւ 20 Փետրուար թուականներուն։ Դատական վերջին նիստին աւազակախումբի պետ Քիւրշատ Եըլմազ վկայութիւններով հանդէս եկաւ։ Ան յայտնեց թէ ոճիրէն առաջ Ֆեդհուլլահ Կիւլենի աղանդին պատկանող կարգ մը անձեր իրեն առաջարկած էին այս ոճիրը, բայց ինք մերժած էր։ Եըլմազ նաեւ պնդեց թէ իրեն այս առաջարկը բերողներէն մէկը այսօր կը շարունակէ որպէս դատաւոր գործել։
Ապա Դատարանը լսեց Ոստիկան զօրաց հրամանատարութեան պաշտօնեայ Սերքալ Էօզէլը։ Էօզէլ նշեց որ այդ շրջանին աւելի ծանրաբեռնուած էին աղանդական շարժուններու ուսումնասիրութեամբ։ «Մենք կը զբաղէինք ծայրայեղ կրօնամոլներու խնդիրներով։ Կը հետաքրքրուէինք նաեւ քրիստոնէութեան քարոզչութեան նիւթերով։ Այս յայտերու վրայ Հրանդ Տինքի իրաւապաշտպան Հաքան Պաքըրճըօղլու հարցուց թէ արդեօք հետաքրքրուած են դատերու ընթացքին Տինքին սպառնացողներուն հետ։
Էօզէլ ժխտական պատասխանեց այս հարցումին։ Նաեւ նշեց թէ սա պահուն չի յիշեր թէ դէպքի օրը իր հրամանին տակ գործող զինուորները ոճիրի պահուն ո՞ւր կը գտնուէին։
«Ֆօքս Թվ» լրատուամիջոցի տնօրէն Էրճան Կիւն ըսաւ թէ 44 ամիսէ ի վեր բանտարկուած է։ Նոյնիսկ եթէ պատիժ ստանար, այսքան ժամանակի ընթացքին ազատ արձակուած պիտի ըլլար։ Հետեւաբար պահանջեց որ վերջ տրուի իր ձերբակալման։ Նմանապէս միւս ձերբակալուած մեղադրեալներն ալ նման պահանջներ ներկայացուցին։ Դատարանը միջնարարէն ետք որոշում մը յայտնեց, մերժեց ձերբակալման վերացումի մասին պահանջները եւ միայն Տրապիզոնի Ոստիկան Զօրաց նախկին հրամանատար Ալի Էօզի տնական բանտարկութիւնը վերացուց, երկիրէ դուրս ելլելը արգիլելով։
Յաջորդ դատավարութիւնը պիտի կայանայ 12, 13 եւ 14 Մայիս թուականներուն։
