ԲԱԳՐԱՏ ԷՍԴՈՒԳԵԱՆ
pakrates@yahoo.com
29Փետրուար եւ 1Մարտ թուականներուն Թաքսիմ՝ «Նիփփոն» հիւրանոցի մէջ կայացաւ հանդիպում մը, շուրջ քսան հասարակական կազմակերպութիւններու մասնակցութեամբ։ Ժողովի ընթացքին քննարկուեցան խտրականութեան տարաբնոյթ երեւոյթներ, որոնք կը վերաբերին ազգային, կրօնական, դաւանանքային, գաղափարական, սեռային, դասակարգային եւլն տարբերութիւններու։
Եւրոմիութեան աղբիւրներու ապահոված գումարը Հրանդ Տինք հիմնարկի գնահատմամբ տրամադրուած էր զանազան հասարակական կազմակերպութիւններու։ Անոնցմէ մէկն էր TOHAV (հասարակութեան եւ իրաւաբանութեան հետազօտութիւններու հիմնարկը» եւ ESHİD (Հաւասար իրաւունքներու հետապնդման միութիւն) որոնք միասնաբար կազմակերպած էին սոյն աշխատանոցը։ Մասնակիցները բացի Իսթանպուլէն, ժամանած էին Անգարա, Իզմիր, Հաքքարի, Մուղլա, Եդեսիա, Մերսին, Էսքիշեհիր, Տիարպէքիր, Անտիոք, Մարտինի նման քաղաքներէ։
Մասնակիցներ նախ քննարկեցին խտրականութեան տեղի տուող գործօնները եւ կազմեցին չորս խմբակներ։ Իւրաքանչիւր խումբ անջատ սեղաններու շուրջ ուսումնասիրեց ա-«Ինչպէ՞ս յաղթահարել քաղաքական ճնշումները», բ-«Ինչպէ՞ս իրազեկել հասարակութիւնը», գ- «Ներքին եւ արտաքին դրութիւններ», դ- «Մարդուժ եւ նիւթական աղբիւր ապահովելու եղանակները»։
Այս խորագիրներուն ներքեւ քննարկուեցան նախ ախտորոշման եւ ապա լուծման եղանակները։ Աւարտին խմբակները ներկայացուցին իրենց հաստատումները եւ առաջարկները, որոնք քննարկուեցան հաւաքաբար։ Այս բոլորի հիման վրայ ձեւաւորուեցաւ իրաւունքներու ձեռքբերման մասին տեղեկութիւններ պարունակող գրքոյկ մը։
