Քորոնա ժահրը առաջին յայտնուած օրերէն հաշուելով բաւականին ուշացումով յայտնուեցաւ Թուրքիոյ մէջ։ Առողջապահութեան Նախարար Ֆահրետտին Քոճա, երբ կը յայտարարէր առաջին վարակման դէպքը Մարտի 11-ն էր։ Այդ օրէն այսօր ժահրով մահացածներու թիւը կը մօտենայ 1500-ի սահմաններուն։
Դէպքի յայտնութիւնով մտահոգութիւններ ծագած էին հաւաքական վայրերու մասին։ Թէեւ կառավարութիւնը իսկոյն դադրեցուց դպրոցական ուսումը կրթական համակարգը վերածելով հեռակայ ուսման ծրագրին։ Սակայն ծանր սպառնալիքի հետ դէմ առ դէմ էին զօրանոցները եւ բանտերը։ Կասեցուեցաւ նոր զինակոչիկներու հաւաքման գործընթացը։ Իսկ բանտարկեալներու համար նախատեսուեցաւ պատժական օրէնքի կանոններու մէջ կատարուելիք բարեփոխումներով մեծ թիւով բանտարկեալները ազատ արձակելու մասին լուծում մը։ Սակայն այստեղ Էրտողանի կառավարութեան հետապնդած նախապատուութիւնները լուրջ անարդարութիւններու ճամբայ բացին։ Այժմ Խորհրդարանի մէջ վերջնական ձեւը գտնող կանոնագրի համաձայն ազատ կ՚արձակուին հասարակութեան մօտ ծանրօրէն դատապարտուած վայրագ ոճիրներու հեղինակները։ Փոխարէնը այս բարեփոխութեան ընձեռած առիթներէն կը զրկուին, բոլոր քաղբանտարկեալները։ Բազմաթիւ քաղաքական գործիչներ, լրագրողներ, մարդու իրաւունքի պաշտպաններ, փաստաբաններ կամ կարճ խօսքով ամէն տեսակ ընդդիմադիրներ զերծ կը պահուին պատրաստուած կանոնագրէն եւ կը շարունակեն մնալ բանտի մէջ։ Ընդդիմադիր կուսակցութիւնները այս մերձեցումը կը դատապարտէին պնդելով, որ նման կարգադրութիւնով անոնք մահուան գիրկը նետուած են։
Այս տեսակի առարկութիւններուն ամենաբարձր հնչած օրերուն էր, որ Արդարադատութեան Նախարար Մեվլուտ Չաւուշօղլու առաջին անգամ ըլլալով յայտարարեց բանտի պայմաններու մէջ մահացողներու մասին տուեալներ։ Նախարարին փոխանցած տեղեկութեան համաձայն արդէն իսկ մահացած են 3 բանտարկեալներ եւ 17 բանտարկեալներ ալ վարակուած են «Քովիտ 19» ժահրով։
Բնականաբար այս յայտարարութիւնը ալ աւելի բարձրացուցած է բանտարկեալներու մասին մտահոգութիւնը։ Էրտողանի իշխանութիւնը իր այս ռազմավարութեամբ միջազգային գետնի վրայ ալ կը հանդիպի զանազան քննադատութիւններու։
