Ժողովուրդներու ժողովրդավարութեան կուսակցութեան Տիյարպէքիրի պատգամաւոր Կարօ Փայլան Խորհրդարանին յղած աղերսագիրով մը պահանջեց, որ այդ կազմը յետաքննութիւն կատարէ Տինքի սպանութեան նիւթով։
Աղերսագրին մէջ Փայլան նախ կը նկարագրէ Հրանդ Տինքի իբրեւ լրագրող յատկութիւնները եւ ապա կ՚անդրադառնայ անոր սպանութեան հասնող գործընթացի զարգացման փուլերուն։ Փայլան կը նշէ, որ 2007-ի Ապրիլին մեկնարկած դատական գործընթացը հեռու է այս ոճիրի բուն հեղինակները յայտնաբերելէ։ Այսպէս ան կը պահանջէ որ Խորհրդարանի ներքին կանոնագրի համապատախան յօդուածներու շրջագծով հարցաքննութիւն մը կատարուի եւ պարզուի այս ոճիրին ընթացք տուող քաղաքական միջավայրը ու մթնոլորտը։ «Դատարանը անտեսած է մահափորձի վճիռը արձակող մութ ուժերը եւ գոհացած է ոճրագործներուն ու անոնց անմիջական գործակցողներուն պատիժներ տնօրինելով» թսած է Կարօ Փայլան։
Հաքան Պաքըրճըօղլուի
դիտողութիւնները
Երբ Հրանդ Տինքի դատավարութիւնը հետզհետէ կը մօտենայ աւարտին Տինք ընտանիքի իրաւապաշտպան Հաքան Պաքըրճըօղլու ալ գրաւոր կերպով յայտնեց դատի մասին իր դիտողութիւնները։ Փաստաբան Պաքըրճըօղլու նշեց, որ դատակազմը յամառօրէն մերժած է հարցաքննութիւնը ընդլայնելու մասին իրենց կողմէ կատարուած բոլոր պահանջները։ Պաքըրճըօղլուի համաձայն դատակազմը զուրկ է ամբողջական դատավարութիւն մը կատարելու տրամադրութենէն։
