«Արթը Կերչէք» կայքէջէն Էվրեն Տեմիրտաշի հաղորդումով տեղեկացանք որ արդարութիւն եւ Զարգացում Կուսակցութենէն գործող քաղաքապետ Շահին Շերիֆօղուլլարը յառաջիկայ ընտրութիւններուն ալ ներկայացուած է իր թեկնածութիւնը եւ ծրագիրներն ալ հասարակութեան յայտնած 1 Մարտին կայացած ժողովի մը ընթացքին։ Ան այս առթիւ նշած է, որ քաղաքի կեդրոնին գտնուող 500 Քմ. տարածքով պատմական Հայ Աւետարանչական Եկեղեցին վերանորոգուելով պիտի վերածուի մշակոյթի կեդրոնի եւ ցուցասրահի։ Սակայն ներկայ դրութեան մէջ եկեղեցին սեփականութիւնն է Սիւլէյման Թիւրքէր անուն քաղաքացիի մը։
Ան կը յայտնէ թէ 2,5 տարի առաջ քաղաքապետարանը իրեն առաջարկած է այդ տարածքի փոխարէն ուրիշ հողամաս մը տալ։ Ապա այս բանակցութիւնները կիսատ մնացին։ «Ես նախապէս այդ տարածքի մէջ պատմական շինութիւնը հիւրանոցի վերածելու համար արտօնութիւն ձեռքբերած եմ Մշակութային Հարստութիւնը Պաշտպանելու Շրջանային Խորհուրդի Տնօրէնութենէն։ Առանց իմ տեղեկութեան սեփական տարածքի վրայ նախագիծ ծրագրելը չեմ հասկցած»։
1904-1907 թուականներու կառուցուած Հայ Աւետարանչական Եկեղեցին անցեալին իբրեւ սրբավայր օգտագործուած էր նաեւ տեղւոյն ասորի համայնքին կողմէ։
անցեալին եկեղեցւոյ փլատակ շէնքը օգտագործուած էր իբրեւ հանրային զուգարան, ալիւրի գործարան, շուկայ եւ գոմ ըլլալով։ Ներկայիս ան կը շահագործուի իբրեւ աւտոկայանատեղի։