12 Մարտին Իսթիքլալ փողոցի «Հըտիվեալ Փալաս» շէնքի մէջ պաշտօնապէս բացումը կատարուեցաւ նորակազմ Եսայեան Մշակոյթի եւ Գրականութեան Միութիւնի։
Այս մասին մամուլին յղուած էր յատուկ լուսաբանութիւն, որու կրճատումը կը ներկայացնենք թերթիս ընթերցողներուն։
«1993 թուականէն մինչեւ այսօր Իսթանպուլի մէջ հայ մշակոյթի եւ գրականութեան օրրան՝ Արաս Հրատարակչութեան նեցուկով եւ 2019-էն ի վեր հրատարակչատան կեդրոնատեղիին մէջ գործունէութիւն ծաւալող Եսայեան Սրահի փորձառութեան վրայ հիմնուելով, 2022-ի Դեկտեմբեր ամսուն հիմնուեցաւ Եսայեան Մշակոյթի եւ Գրականութեան Միութիւնը։
Արաս Հրատարակչատան երդիքին տակ մինչեւ օրս հաւաքուած հատորներէն
գրադարան մը կազմելով, կ՚ուզենք Թուրքիոյ մէջ խորունկ արմատ ունեցող հայերէն հրատարակութեան ժառանգութեան շարունակութեան սատար կանգնիլ եւ ուսումնասիրական աշխատանքներու համար պարարտ հող պատրաստել։
Երկար տարիներու ջանքի արդիւնք եղող գրադարանը այժմ կը պարունակէ 8000-էն աւելի հատոր, 200-էն աւելի պարբերականներու հազարաւոր թիւեր, ձեռագիրներ, թերթերէ առնուած էջեր, լուսանկարներ, քարտէզներ, նամակներ, որմազդեր, գրքոյկներ, ձայնային եւ տեսերիզային արձանագրութիւններ։
Նուիրատուութիւններով, նուէրներով եւ Արասի հրատարակչական աշխատանքներու արդիւնքով հաւաքուած գրադարանի դասաւորումը եւ ցուցակագրումը 2021 թուականէն ի վեր կը կատարուին աշխատակիցներու եւ կամաւորներու ջանքերով։ Ցուցակները հասանելի են yesayan.org կայքէջին վրայ։
Նորոգութեան ընթացքը հսկեց ճարտարապետ Զաքարիա Միլտանօղլուն եւ
ձեւաւորումը ըրաւ արուեստագէտ Սէրտար Աքա։ Միութիւնը նաեւ բախտը ունեցաւ վայելելու Քալչըր Սիվիք նախաձեռնութեան օժանդակութիւնը, ապահովելու համար գիրքերուն եւ արխիւներուն պահոցները։
Միութեան զանազան մշակութային եւ ակադեմական առիթներուն եւ աշխատանոցներուն համար ապահովուած է տարածք մը եւ բոլոր ուսումնասիրողներուն եւ այցելուներուն գրադարանէն օգտուելու համար ընթերցասրահ մը։
Բանաւոր պատմութեան եւ յիշողութեան աշխատանքներու համար լսողական եւ տեսերիզային արձանագրութիւններ կատարելու համար անկիւն մը։ Նաեւ պատրաստուած է միութեան աշխատակիցներուն եւ կամաւորներուն համար գրասենեակային անկիւն մը, ուր կ՚իրականացուին դասաւորումի եւ ցուցակագրութեան աշխատանքները։