ՊԷՍՍԷ ՔԱՊԱՔ
Բաւական դժուար աշխատութիւն կը պահանջէ Սուրբ Սարգիսի տօնակատարութիւններու նախապատրաստութիւնը։ Մենք սասնեցիներ Երկուշաբթիէն կը սկսինք այդ պատրաստութեան։ Նախ կը լծուինք առաջին դժուարութիւնը հարթելու, անհրաժեշտ նախանիւթերը ապահովելու։ Սուրբ Սարգիսի խորհրդանշանը փոխինդն է, որուն համար պէտք ունինք ընդեղէնի եօթը տեսակներուն։ Սիսեռը, ցորենը կամ լոբին ճարելը համեմատաբար դիւրին է։ Բայց եթէ գիւղին հետ կապդ ալ խզուած է, պիտի դժուարանաս կըլկըլ կամ գաւառսի նման անունը անգամ շատերուն անծանօթ հատիկները հայթայթել։ Աւանդութիւնը այսպէս կը պահանջէ, ընդեղէնի եօթը տեսակներ։ Կարծես վեց ըլլայ աւետարանէն էջ կը պակսի։
Նախանիւթը ապահովելով կրնանք անցնիլ երկրորդ դժուարութեան։ Նախ եւ առաջ զոհաբերելու արժանի սան մը պէտք է ճարել։ Սանը կը տեղադրես կրակարանի ճաղին վրայ եւ մաղմաղ, մարմանդ կրակով կը սկսիս ընդեղէնը խանձելու։
Հասած ենք երրորդ դժուարութեան։ Ջաղացքի մը կարիք ունինք։ Խանձուած ընդեղէնը պիտի աղենք։ Ջաղացք որ կ՚ըսեմ, խոհանոցներու մէջ յաճախ գործածուած սարքը մի կարծէք։ Փոխինդի ջաղացքը իւրաքանչիւրը տասը-տասնըհինգ քիլօկրամ կշռող երկու քարերու իրարու վրայ պտըտելով կ՚աշխատի։ Այս գործողութեան պահուն տունն ալ հետզհետէ ալիւրաղած ջաղացքի մը կը վերածուի։ Անբաւարար կ՚ըլլայ ընդեղէնի փոշիին սենեակով մէկ տարածուելուն արգելք ըլլալու համար փռուած սփռոցը։ Խանձելու պահուն ելլող բուրմունքը երբեք հաճելի չէ։ Բայց աղալու պահուն փոխինդի քաղցր հոտը կը պատէ ամէն կողմ։
Ի վերջոյ պատրաստ է փոխինդի ալիւրը։ Հիմա կարգը եկած է այդ ալիւրը մասերու բաժնել եւ դուռ դրացիներու նուիրելու։
Հասած ենք Շաբաթ օրուան դարձեալ մաղմաղ կրակի վրայ եփ ելլող ջուրին մէջ կը լեցնենք փոխինդը եւ կը սկսինք անընդհատ խառնել մինչեւ որ փխրանայ։ Վերջին հարուածն է այդ մածուկին վրայ հալած կարագը թափել։
Այս տարի ալ Իսթանպուլի նման մեծ քաղաքի պայմաններուն մէջ յաջողեցանք Սուրբ Սարգիսի ուխտը կատարել։ Տուներնիս օրհնուեցաւ Սուրբի առատութիւնով։ Բոլոր Սարգիսներու անունը շնորհաւոր։
