ԲԱԳՐԱՏ ԷՍԴՈՒԳԵԱՆ
Պոլսահայ թատերական կեանքի աւագ եւ կրտսեռ երկու նուիրեալ գործիչներ Պօղոս Չալկըճըօղլու եւ Եղիա Աքկիւն, 11 Մայիս շաբաթ յետմիջօրէին այս անգամ Եսայեան Միութեան կեդրոնին մէջ ներկայացուցին քաղաքիս արդի բանաստեղծութեան լաւագոյն ներկայացուցիչներէն Իգնա Սարըասլանի «Իրիկնամուտին Թոտորի» անուն բոեմը։
Այս մէկը «Արաս» հրատարակչատան նախկին խմբագրատան մէջ գործող նորակազմ Եսայեան Միութեան նախաձեռնած երրորդ միջոցառումն էր։ Առաջինն էր «Զապէլ Եսայեանի պայքարը», որուն շուրջ զրուցեցին Նորա Թաթարեան եւ Գայուշ Կավրիլոֆ, ժողովավարութեամբ Սեսիլ Արթուչի։
Երկրորդը ձօնուած էր Միսակ Մանուշեանի ֆաշիզմի դէմ հայդուկական պայքարին, որ ներկայացուց Մասիս Քիւրքչիւկիլ։
«Իրիկնամուտին Թոտորի» բոեմը առասպելական շարադրութիւն մըն է, ուր պոլսահայ գիր ու գրականութեան, մշակոյթի, երաժշտութեան հսկաներ կը մէկտեղուին կապելայի մը մէջ, իրենց կողքին ունենալով այլազգի բազում դէմքեր, բոլորն ալ իրենց ժամանակի համբաւաւոր անձինք, որոնք շատ լաւ կը հասկնան զիրար, իրենց յոյզերով ու հոգերով։
Պոլսոյ բնանկարի ենթաֆոնին վրայ երկու դերասաններ արտակարգօրէն հիւթիչ արտասանութեամբ նկարագրեցին եւ ինչու չէ, համարեա կենդանացուցին Իգնա Սարըասլանի գրական տողերը։
Ներկաներ մատնուեցան այն տպաւորութեան, թէ այդ պահուն դուրս եկած են նկուղային այդ սենեակէն եւ Մարմարա Ծովու քամին իր հետ բերելով ուզոյի բուրմունքը, փոքրիկ սարսուռ մը յառաջացուցած է եւ ակամայ կը տարուին դէպի վերեւ նայելու, մի գուցէ աստղափայլ երկինքը տեսնելու ցանկութեամբ։
Միջոցառման աւարտին միութեան անդամներէն Նորայր Օլկար յայտնեց թէ յառաջիկայ շաբաթ օր նոյն վայրի մէջ պիտի զրուցեն ամերիկահայ անուանի երգահան Արա Տինքչեան եւ երկար տարիներ իր հետ համագործակցած Պուրճու Եըլտըզ, նիւթ ունենալով նախորդ դարասկզբի ամերիկահայ դասականացած երաժշտութեան նմոյշները։
Նաեւ պարտինք նշել թէ Արա Տինքչեան նման թեմայով ելոյթ պիտի ունենայ 17 Մայիսին Անարատ Յղութիւն շէնքի «Հաւաք» սրահին մէջ։