1 Նոյեմբերի ընտրութիւններու արդիւնքները ինչպէս երկրի մէջ, երկրէ դուրս ալ անսպասելի գտնուեցան։ ԱՔՓ 7 Յունիսի նահանջէն ետք յաջողեցաւ իր կորսնցուցած ձայները աւելիով վերաշահիլ։ Նախորդ ընտրութեան ընթացքին մեծ յաղթանակ տարած ՀՏՓ ալ իր կարգին նահանջեց եւ այս պայմաններու տակ համատարած մտահոգութիւն գոյացաւ երկրէ ներս լարուած իրավիճակին բնականոնացման մասին։ Արդարեւ նոյն ընտրութեան օր, գիշերուայ ժամերուն Թուրքիոյ Օդային Ուժերը թռիչքներ կատարելով ռմբակոծեցին Քանտիլ լերան վրայ նախապէս ճշդուած թիրախները։ Յաջորդ օր իսկ քրտաբնակ քաղաքներու մէջ վերսկսաւ ոստիկանական գործողութիւնները։ Սիլվանի մէջ այդ գործողութիւններու ընթացքին զոհուեցան երկու երիտասարդներ։ Չորեքշաբթի երեկոյ ոստիկանութիւնը նոր գործողութիւններու ձեռնարկեց Լճէի դաշտային տարածքներու մէջ։ Բոլոր այս զարգացումներու լոյսին տակ զանազաններու կարծիքը շօշափեցինք ընտրութեան հետեւանքներուն մասին։
Ճումա Չիչէք՝ քրտական քաղաքականութիւնը ալ աւելի ինքնավար կը դառնայ
«ՀՏՓ-ն բաղդատմամբ 7 Յունիսի, 1 միլիոնի մօտ ձայներու կորուստ ապրեցաւ։ Բայց այս համեմատութիւնը ՀՏՓ-ի իրական ուժն է։ Նահանջով հանդերձ ՀՏՓ քրտաբնակ 20 քաղաքներու մէջ որոշիչ տարր է։ Իսթանպուլ, Իզմիր, Մերսին եւ Ատանայի նման մեծ քաղաքներու մէջ կուսակցութիւնը կրցած է պահել իրեն ուղղուած զօրակցութիւնը։ Բայց Անգարա, Պրուսա, Քոճաէլի, Թէքիրտաղ, Այտըն, Մուղլա եւ Անթալիոյ մէջ արձանագրած նահանջներուն նայելով կարելի է ըսել որ ՀՏՓ կորսնցուց իր ռազմավարական կարեւորութիւնը»։
Կարօ Փայլան՝ «լուծման գործընթացին կասեցումով կողմնորոշումներն ալ յստակացան»
«Մեր ակնկալածէն աւելի քիչ ձայներ ստացանք։ Մէկ տարուայ ընթացքին յաջողած էինք մեր ստացած ձայները կրկնապատկել։ Սակայն լուծման գործընթացի կասեցումով բեւեռացումն ալ խստացաւ։ Քրտաբնակ տարածքներու ժողովուրդը բաւականին յոգնած է։ Բանակցութեան սեղանը ճիշդ ալ լուծումին մօտ կարծուած պահուն տապալեցաւ։ ԱՔՓ-ի կողմնակիցները դիւրաւ կ՚ուղղուին իրենց կուսակցութեան կողմէ։ Երկու տարի առաջ անոնք զօրակցած էին լուծման գործընթացին։ Իսկ հիմա ալ կը զօրակցին բանակցութեան սեղանի տապալումին։ Մենք այս երեւոյթը գիտնալով պիտի աշխատինք որ ԱՔՓ իր քաղաքական ուժը շահագործէ խաղաղութեան ի նպաստ»։
Կարօ Փայլան ապա աւելցուց որ այս նոր շրջանին որդեգրած են շինիչ ընդդիմութեան ռազմավարութիւնը։ «Հաստատութիւններու եւ պատրիարքի ընտրութեան խնդիրներ ունինք։ Այդ խնդիրներու կողքին Պատրիարքարանի իրաւական հանգամանքը ճշդելու համար ալ օրէնքի առաջարկներ պատրաստած եմ, որոնք պիտի յղեմ խորհրդարնի օրակարգին»։
