Թուրքիոյ բռնցքամարտի պատմութեան մէջ իւրայատուկ բացառիկ դէմք մըն էր Կարպիս Զաքարեան, որ 25 Յունուար 2020-ին կնքեց իր մահկանացուն 90 տարեկան հասակին։ Իրականութեան մէջ Կարպիս Զաքարեան Թուրքիոյ բռնցքամարտի պատմութեան մէջ հայերու ունեցած կարեւոր աւանդի շարունակութիւնն էր միայն։ Իրմէ առաջ ռինկերու վրայ բռունցքուելով առասպելի վերածուած եւ այսօր շատերու յիշողութենէ դուրս մնացած կարեւոր անուն մըն է նաեւ Բագրատը։
Նոյնիսկ Բագրատ իր կեանքը աւարտած էր ռինկի վրայ յոյն բռնցքամարտի հետ տարած պայքարին։ Այդ տարիներուն նոյնիսկ տակաւին հիմքը չէր դրուած Բռնցքամարտի Ֆետերացիային։
Կարպիս Զաքարեանի մարզական քարիէրան սկսաւ «Պէյօղլու Սփոր» եւ «Թաքսիմ» ակումբներու մէջ, ուրկէ ետք ան անդամակցեցաւ Կալաթասարայ ակումբին։ Իր մարզական անցեալին մէջ ունեցաւ բազում յաղթանակներ, որուն շնորհիւ վայելեց երկրի հասարակութեան մեծ համակրանքը։
Կարպիս Զաքարեանի յուղարկաւորութիւնը տեղի ունեցաւ 29 Յունուար չորեքշաբթի օր, Պէյօղլուի Սուրբ Երրորդութիւն եկեղեցւոյ մէջ։ Մօտ անցեալին Կարպիս Զաքարեանի կեանքը հատորի մը մէջ լոյս տեսած էր ինք եւս բռնցքամարտի մրցավար եղած Էմինա Թեմելի գրիչով։
«Ո՞ւր ես Կարօ» խորագրեալ այդ մենագրութեան մէջ հեղինակը ալ աւելի ծանրացած էր անուանի բռնցքամարտիկի եւ կողակցի Էրսիլեայի մեծ սիրոյն վրայ։ Իսկապէս ալ յաւիտենական էր այդ սէրը, որ շարունակուեցաւ մինչեւ նախ Էրսիլեայի եւ ապա Կարպիսի մահը։
Ինչպէս կեանքի բազում երեւոյթներուն Կարպիսի օրինակով ալ պետութիւնը փորձած էր անտեսել այս հսկայ մարզիկի թողած մեծ աւանդը։ Ճիշդ ալ այս պատճառաւ Ժողովրդներու Ժողովրդավարութեան կուսակցութեան պատգամաւոր Կարօ Փայլան դիմում մը կատարած է Երիտասարդութեան եւ Մարմնամարզութեան Նախարար՝ Մեհմետ Մուհարրէմ Քասափօղլուի, հարց տալով թէ մինչեւ այսօր ինչո՞ւ համար Կարպիս Զաքարեանի անունը չէ տրուած մարզասրահի մը, ինչ որ անցեալին այդ պատիւը չէ խնայուած Կարպիսի աշակերտը ըլլալով հանդիսացող Ճեմալ Քամաճըէն։
Ահաւասիկ անուն մը, որ միշտ յարգանք ցուցաբերեց իր ուսուցիչին հանդէպ։ Բայց պետութիւնը խտրականութիւն դրաւ երկու բռնցքամարտիկներու միջեւ, պատուելով Քամաճընի եւ անտեսելով Զաքարեանը։ «Մտադի՞ր էք Քամաճըի նման Կարպիս Զաքարեանի անունով օժտուած մարզական դահլիճ մը կառուցելու» հարց կու տայ Կարօ Փայլան։