«Փոքրիկ» կայքէջը Քորոնայի օրերուն ալ կը շարունակէ արեւմտահայերէն հէքեաթներ մատուցել մանուկներուն, եւ նպաստել Հայերէնի ուսուցման։ Ներկայիս, «Փոքրիկ»ին կը հետեւին հայ բնակչութեան տէր՝ 21 երկիրներ։ Ամբողջ աշխարհի մէջ հեռակապ ուսուցման գործադրութեան հետեւանքով՝ վերջին երկու ամսուան մէջ՝ «Փոքրիկ»ին այցելուներուն թիւը յաւելում ունեցաւ %82 տոկոսով։
Վերջերս, «Փոքրիկ»ը նոր ծրագիր մը կը գործադրէ։ Այս ինքնամէկուսացման շրջանին «Տունը մնանք, Փոքրիկ դիտենք» վերնագիրի տակ, facebook-ի, twitter-ի եւ instagram-ի մէջ տեղ կը բանայ այն բոլոր մանուկներուն, որոնք կը փափաքին Հայերէն արտասանել կամ երգել, գրել, գծել, պարել։ Հետեւաբար պիտի հրատարակուին մանկանց ստեղծագործութիւնները եւ կամ զանազան հնարամտութիւնները, որոնց պիտի հետեւին 21 երկիրներու «Փոքրիկ»ի հետեւորդները։
Գունագեղ, շարժուն, լսելի
«Փոքրիկ»ը իր վեցերորդ տարին պիտի բոլորէ Մայիս 2020-ին։ Ան՝ամէն ամիս երկու նոր հէքեաթ կ՚աւելցնէ ներկայիս իր ունեցած 100-է աւելի հէքեաթներուն վրայ։ Այս հէքեաթներուն իւրաքանչիւրը գունաւոր շարժուն պատկերներով կը զարդարուի եւ կը ձայնագրուի։
«Փոքրիկ»ին բոլոր հէքեաթները, կայքէջի առընթեր, լոյս կը տեսնեն նաեւ you tube-ի մէջ, որոնք կը պատրաստուին՝ 4-7 եւ 8-12 տարիքի մանկանց համար։ Այս հէքեաթները, առանց դասի եւ նիշի ճնշման տակ, իր փոքրիկ ընթերցողներուն առիթ կը ստեղծէ իրենց մայրենիին հետ հաճելի ժամանցի եւ միեւնոյն ժամանակ կը մղէ մտածելու եւ քննարկելու՝ արդարութեան, համակրական հասկացողութեան, քաջութեան, վերամշակումի, բնապահպանութեան եւ այլ գաղափարներու վրայ։
Թէ խաղ, թէ վարժութիւն
Վերջերս աւելցուած՝ «Աշխատութեան Էջեր» խորագրեալ յաւելուածը, Հէքեաթ կարդալու հաճոյքին առընթեր, նոր բառերու եւ բնաբաններու հետ ծանօթանալու, կարդացածը եւ լսածը աւելի լաւ ըմբռնելու առիթը կը ստեղծէ։ Աշխատութեան էջերուն վրայ տեղ կը գրաւէ հէքեաթներու բնագիրին համեմատ պատրաստուած խաղերն ու բացատրութիւնները, որոնք թէ ծնողներուն, թէ մանկավարժներուն, այդ հէքեաթի վրայ մանկանց հետ միասին մտածելու եւ խորհդակցելու միջավայր կ՚ապահովէ։
«Փոքրիկ»ը կը պարունակէ՝ հայկական ժողովրդական հէքեաթներ, առակներ, առասպելներ, դիցաբանական պատմութիւններ, շուտասելուկներ, սուտասելուկներ, ժամանակակից պատմութիւններ։ Հայ մանկական գրականութեան առաջատար ներկայացուցիչներ եւ համաշխարհային գրականութեան անուանի գրողներ միասին տեղ կը գրաւեն «Փոքրիկ»ին մէջ։ Կայքէջը կը պարունակէ Թումանեանի, Խնկոյեանի, Աղայեանի, Այգեկցիի, եւ այլ Հայ գրողներուն բազմաթիւ գործերը։ Կը պարունակէ նաեւ Ուիլիըմ Սարոյեանի, Օսգար Ուայլտի, Սէրվանդէսի նման աշխարհահռչակ գրողներու գործերը, որոնք հայերէնի թարգմանուած են մանուկներուն համար։ «Փոքրիկ»ը նաեւ տեղ կը բանայ իր կայքէջին մէջ, յատկապէս՝ Անահիտ Սարգիսեանի եւ այն բոլոր ժամանակակից գրողներուն, որոնք կը հետաքրքրուին մանկական գրականութեան հետ եւ կ՛արտադրեն արեւմտահայերէնով։
Պոլիսէն Աւստարալիա
«Փոքրիկ» հէքեաթարանի կայքէջին հետեւորդներուն %70-ը վեց տարբեր քաղաքը կ՛ապրին՝ Պոլիս, Երեւան, Մոսկվա, Լոս Անճելըս, Մարսէյ եւ Մոնրէալ։ Իսկ մնացեալ %30-ը կը բնակին լայնածաւալ աշխարհագրութեան մէջ։ Որոնցմէ են՝ Աւստարալիա, Արժանթին, Լիբանան, Միացեալ Արաբական Էմիրութիւններ, Եգիպտոս, Ֆիլիբիններ։
www.pokrig.org
Fb @pokrig
Instagram @pokrig_hekiataran
Twitter @Pokrig
Youtube Pokrig Hekiataran
