2013 թուականին «Կէզի» զբօսայգիի մէջ կատարուած բողոքի ցոյցերը մեծ տպաւորութիւն թողած են Թուրքիոյ քաղաքացիական պատմութեան մէջ։ Այդ պատճառաւ ալ ամէն տարի Մայրիսի 31-ին կը յիշուին այդ դէպքերը եւ իշխանամէտ կամ ընդդիմադիր մամուլը իւրաքանչիւրը իր կողմէն դիտուած մեկնաբանութիւններով կը վերլուծեն պատահածները։
Այս տարի մանաւանդ ալ գայթակղութեան համազօր անօրինութիւններով աւարտած դատավարութիւններէ վերջ «Կէզի»ի դէպքերու յիշատակումը շատ աւելի աղմկայարոյց նշուեցաւ։ Արդէն բոլորին ծանօթ է խորհրդարանական եւ նախագահական ընտրութիւններու ընդառաջ իշխանութեան գործադրած լարուածութեան ռազմավարութիւնը։ Կարծես բոլոր այս գործօնները իրար ամբողջացնելով այս տարուայ յիշատակումները շատ աւելի լարուած մթնոլորտնի մը վերածեցին։
Թաքսիմի Զօրակցութեան Հարթակը կոչ ուղղեց հրապարակին վրայ մէկտեղուելու համար։ Մինչ այդ Թուրքիոյ Բանուորական Կուսակցութեան նախագահը եւ երեսփոխաններ Վոսփորի կամուրջին վրայ պարզած պաստառով փորձեցին հասարակութեան ուշադրութիւնը ուղղել այդ օրերու անցուդարձներուն։
Այդ շարժումի դէմ ոստիկաններու վերաբերումը բաւականին սուր եղաւ եւ ոստիկանութիւնը իր լիզօրութիւններու սահմանները ոտնակոխելով բռնութիւն կիրարկեց երեսփոխաններու դէմ։
Միւս կողմէ երեկոյեան ժամերուն բազմահարիւր ցուցարարներ մէկտեղուեցան Ճարտարապետներու սենեակի առջեւ եւ փորձեցին բարձրաձայնել իրենց իսկ պատրաստած մամալոյ յայտարարութիւնը։ Ոստիկանները այստեղ եւս դիմեցին բռնութեան եւ բազմաթիւ ցուցարարներ բերման ենթարկուեցան։
Նաեւ խոշտանգուեցան ընդդիմադիր մամուլի թղթակիցներ եւ նկարահաններ։
Այս բոլորին զուգահեռ բանտարկուած մտաւորականներու անունով Միւճելլա Եափըճը ալ բանտէն ուղղարկած գրառումով մը ողջունեց դիմադրութան կամքը։