ԻՇԽԱՆ ԷՐՏԻՆՉ
Հրանդ Տինք Հիմնարկի նախաձեռնութեամբ կազմակերպուած «Համակեցութեան Փառատօնը» կայացաւ 2 եւ 3 Յուլիս թուականներուն Հարպիյէ, Լիւթֆիւ Քըրտար Համագումարներու Կեդրոնին մէջ։
Փառատօնին կը մասնակցէին աշխարհի զանազան երկիրներէն եւ Թուրքիայէն հասարակական կազմակերպութիւններ, իրաւապաշտպաններ, ակադեմականներ եւ ուսանողներ։
Փառատօնը մեկնարկեց բացման ճառերով։ Իրողութեան, Արդարութեան եւ Յիշողութեան Կեդրոնի վարիչ Մուրատ Չելիքքան ելոյթ ունենալով գոհունակութիւն յայտնեց մեծ թիւով հասարակական կազմակերպութիւններու ներկայացուցիչներու մասնակցութեան համար։
Ան նշեց որ ալաւելի ուրախ է երիտասարդ սերունդի ներկայութիւնը տեսնելով։ «Երիտասարդութեան ներկայութիւնը ապացոյցն է Թուրքիոյ մէջ մարդու իրաւունքներու եւ ազատութեան ձեռքբերման համար մղուած պայքարի յարատեւութեան։ Կ՚ապրինք շրջան մը, ուր իրաւունքներու եւ ազատութիւններու սահմանափակումը պետական քաղաքականութիւն դարձած է։ Մարդիկ յանձն կ՚առնեն խաղաղ ցոյցերու մասնակցիլ, գիտնալով հանդերձ թէ բերման պիտի ենթարկուին, նոյնիսկ ձերբակալուին եւ դատուին։ Այս պայմաններու մէջ անգամ ոչ կանայք, ոչ գոյութիւնը ուրացուող ԼԿՊԹ-ի անհատները, ոչ լրագրողներ եւ ոչ ալ մարդու իրաւունքներու համար պայքարող կազմակերպութիւններ կը հրաժարին իրենց պայքարը առաջ տանելէ եւ փողոց ելլելէ։ Պահը կը թելադրէ կողք կողքի կանգնիլ, զօրակցիլ եւ միասնաբար դիմադրել։ Կը յուսամ թէ այս մէկտեղումն ալ նոյն նպատակին պիտի ծառայէ»։
Չելիքքան ապա շնորհակալութիւն յայտնեց համակեցութեան փառատօնի մը առաջարկը բերող Տելալ Տինքին եւ իր ելոյթը եզրակացուց փաստաբան Էրեն Քեսքինի. «Հոս ենք, չե՛նք երթար» խօսքերով։
Ապա կայացաւ ատելութեան պատգամի դէմ պայքարը նիւթ ունեցող նիստը։
Երկօրեայ փառատօնի ընթացքին բացի զանազան բնագաւառի նիւթերով հիւսուած ասուլիսներէ, գործադրուեցան զանազան աշխատանոցներ եւ երաժշտական ելոյթներ։
Միջոցառման Հրանդ Տինք Հիմնարկի կողքին մասնակցութիւն բերած էին Անատոլու Քիւլթիւր, ԹԷՕՍ, Ալի Իսմայիլ Քորքմազ Հիմնարկը, Հրէից 500-ամեակի Հիմնարկը, Միջազգային Ներման Կազմակերպութիւնը, Իրողութեան Արդարութեան եւ Յիշողութեան Կեդրոնը, ՊԱՅԷԹԱՊ, Քըրքայաք, Էթքինիզ ԵՄ, Թահիր Էլչի Հիմնարկը եւ այլ հասարակական կազմակերպութիւններ, որոնք իրենց տրամադրուած սեղաններու շուրջ բացատրութիւններ տուին փառատօնի այցելուներուն։
