Իրան-Ատրպէյճան ռազմափորձ՝ Արցախի մէջ, իսկ Հասանով Թել Աւիւի մէջ Իսրայէլի հետ համագործակցութիւնը կը քննարկէ

Ատրպէյ­ճան եւ Իրան հեր­թա­կան միացեալ ռազ­մա­փոր­ձե­րը կը կա­տարեն, բայց 19 Մայի­սին ըն­թացք առած­նե­րը առա­ջին ան­գամ ըլ­լա­լով տե­ղի կ՛ու­նե­նան բռնագ­րա­ւուած Արցա­խի մէջ։ «Արազ 2025» խո­րագի­րով եռօ­րեայ ռազ­մա­փոր­ձե­րը, քա­ղելով ատրպէյ­ճա­նկան կող­մին հրա­պարա­կած տե­սանիւ­թե­րէն՝ տե­ղի կ՛ու­նե­նան Իրա­նին սահ­մա­նակից Հադրու­թի շրջա­նին մէջ: Մինչ սահ­մա­նակից եր­կիրնե­րու զի­նուո­րական­նե­րը միացեալ ու­ժե­րու ռազ­մա­փոր­ձեր կը կա­տարեն հա­ւանա­կան սպառ­նա­լիք­նե­րու դէմ, նոյն վայրկեան­նե­րուն Ատրպէյ­ճա­նի պաշտպա­նու­թեան նա­խարար Զա­քիր Հա­սանով Իրա­նի վա­ղեմի հա­կառակորդ Իս­րա­յէլի իշ­խա­նու­թիւննե­րուն հետ Թել Աւի­ւի մէջ կը քննար­կէ ապա­հովու­թեան երկկողմ հա­մագոր­ծակցու­թեան վե­րաբե­րող հար­ցեր: Իս­րա­յէլի պաշտպա­նու­թեան նա­խարար Իս­րա­յէլ Քաց բարձր գնա­հատեց եր­կու եր­կիրնե­րուն մի­ջեւ ձե­ւաւո­րուած ռազ­մա­վարա­կան գոր­ծակցու­թիւնը. կող­մե­րը պայ­մա­նաւո­րուե­ցան ընդլայ­նել երկկողմ ռազ­մա­կան գոր­ծակցու­թիւնը։ Իս­րա­յէլի իշ­խա­նու­թիւննե­րուն մօտ «Jewish News Syndicate» թեր­թը կը յայտնէ, որ Իս­րա­յէլի հա­մար իր ոխե­րիմ թշնա­մի Իրա­նին սահ­մա­նակից Ատրպէյ­ճա­նի հետ կա­պերը ռազ­մա­վարա­կան նշա­նակու­թիւն ու­նին` հե­տախու­զա­կան տո­ւեալ­նե­րու փոխանցման գծով: Ամիս­ներ առաջ, «The Times of Israel» թեր­թը. մի­ջազ­գա­յին զե­կոյցնե­րը վկա­յակո­չելով՝ յայտնած էր, որ Ատրպէյ­ճան, ամե­նայն հա­ւանա­կանու­թեամբ, Իս­րա­յէլին կ՛ար­տօ­նէ իր տա­րած­քին մէջ տե­ղակա­յուած խա­րիսխնե­րը օգ­տա­գոր­ծել՝ Իրա­նի դէմ հետա­խու­զա­կան թռիչքներ իրա­կանաց­նե­լու նպա­տակով: Այս մա­սին Թեհ­րան բազ­մա­թիւ ան­գամներ անդրա­դար­ձած է եւ դա­տապար­տած Ատրպէյ­ճա­նի ու Իս­րա­յէլի մի­ջեւ դի­ւանա­գիտա­կան մեր­ձե­ցու­մը` Պա­քուն մե­ղադ­րե­լով Իրա­նի դէմ դա­ւադ­րութիւննե­րուն մէջ ներգրա­ւուե­լու յան­ցանքով: Սա­կայն, Ալիեւի վար­չա­կազ­մը մե­ղադ­րանքնե­րը կտրա­կանապէս հերքեցին: