.Ա.Տ. Սահակ Բ. Պատրիարք Հայրը 18 Մայիս 2025, Կիրակի առաւօտ Վատիկանի մէջ մասնակցեցաւ Ն.Ս.Տ.Տ. Լեւոն ԺԴ. Նորընտիր Պապի գահակալութեան եւ պաշտօնի ձեռնարկման հանդիսութեան:
Նորին Ամենապատուութիւնը 17 Մայիս, Շաբաթ, յետ միջօրէին, հանդիսութեան մասնակցելու համար մեկնեցաւ Հռոմ: Մեր Հոգեւոր Պետին կ’ուղեկցէր Արժ. Տ. Տրդատ Ա. Քհնյ. Ուզունեան:
Նորին Ամենապատուութիւնը Հռոմի օդակայանին մէջ դիմաւորուեցաւ Արեւմտեան Եւրոպայի Հայրապետական պատուիրակ եւ Վատիկանի Սուրբ Աթոռի մօտ Հայ Եկեղեցւոյ ներկայացուցիչ Գերշ. Տ. Խաժակ Արքեպս. Պարսամեանի կողմէ: Նոյն ժամերուն օդակայան հասան նաեւ Մեծի Տանն Կիլիկիոյ Կաթողիկոսութեան ներկայացուցիչներ Գերշ. Տ. Անուշաւան Արքեպս. Դանիէլեան եւ Գերշ. Տ. Գեղամ Արքեպս. Խաչերեան, Երուսաղէմի Պատրիարքութեան ներկայացուցիչներ Գերշ. Տ. Կորիւն Եպս. Պաղտասարեան եւ Հոգշ. Տ. Աղան Վրդ. Կէօքճեան:
Նոյն գիշեր Նորին Ամենապատուութեան գլխաւորութեամբ Հայ Եկեղեցւոյ պատուիրակութիւնը սիրոյ սեղանով հիւրասիրուեցաւ Գերշ. Տ. Խաժակ Արքեպս. Պարսամեանի կողմէ:
18 Մայիս 2025, Կիրակի առաւօտ Վատիկանի Ս. Պետրոս Մայր Տաճարին մէջ տեղի ունեցաւ նորընտիր Ն.Ս.Տ.Տ. Լեւոն ԺԴ. Սրբազան Քահանայապետի «Հռոմի եպիսկոպոսի Պետրոսեան առաքելութեան սկիզբի արարողութիւն»ը, որուն յանուն Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի անունով մասնակցեցաւ Նորին Ամենապատուութիւնը:
Ներկայ էին Ն.Ս.Տ.Տ. Պարթոլոմէոս Ծայրագոյն Պատրիարքի գլխաւորութեամբ բոլոր եկեղեցիներու ներկայացուցիչներ, ինչպէս նաեւ երկիրներու թագաւորներ, թագուհիներ, նախագահներ:
Հանդիսութեան ընթացքին նորընտիր Ն.Ս.Տ.Տ. Լեւոն ԺԴ. Սրբազան Քահանայապետին յանձնուեցան պապական եմիփորոնն ու հովուական մատանին: Քարոզեց Սրբազան Պապը:
Յաւարտ Ս. Պատարագի հիւր եկեղեցականներ Պօղոս Զ. կեդրոնին մէջ հիւրասիրուեցան Եկեղեցիներու Միութեան Պապական Խորհուրդի Նախագահ Կարտինալ Քուրթ Քոխի կողմէ:
Նոյն երեկոյեան, մեր Հոգեւոր Պետը այցելեց Հռոմի Քահանայապետական Լեւոնեան Հայ Կաթոլիկ Վարժարանը, ուր դիմաւորուեցաւ Հայ Կաթողիկէ Եկեղեցւոյ Նորին Գերերջանկութիւն Ռաֆայէլ Պետրոս ԻԱ. Կաթողիկոս Պատրիարքի կողմէ՝ Հրաշափառի արարողութեամբ:
Վատիկանի մէջ շփումներ
Ն.Ս.Տ.Տ. Լեւոն ԺԴ. Սրբազան Քահանայապետը Վատիկանի մէջ 19 Մայիս 2025, Երկուշաբթի առաւօտ ընդունեց քոյր եկեղեցիներու եւ այլ կրօններու ներկայացուցիչները, որոնք մասնակցած էին «Հռոմի եպիսկոպոսի եւ Պետրոսի յաջորդի» իր առաքելութեան մեկնարկի արարողութեան։
Այս ընդունելութեան մաս կազմեց նաեւ Հայ Եկեղեցւոյ պատուիրակութիւնը, որուն կը գլխաւորէ Ն.Ա.Տ. Սահակ Բ. Պատրիարք Հայրը:
Նորին Սրբութիւնը ներկաներուն յորդորեց գործակցիլ խաղաղութեան համար՝ գերադասելով այդ նպատակը գաղափարական եւ քաղաքական շահերէ։ Քահանայապետը խրախուսեց միջեկեցական շարժումը, կոչ ըրաւ շարունակել քրիստոնեաներու եւ հրեաներու միջեւ երկխօսութիւնը, ինչպէս նաեւ մահմետականներու հետ յարաբերութիւնները կառուցել փոխադարձ յարգանքի ու խղճի ազատութեան հիման վրայ։
Դիմելով քոյր եկեղեցիներու ներկայացուցիչներուն՝ Քահանայապետը նախ անդրադարձաւ «համընդհանուր եղբայրութեան» գաղափարին՝ յիշելով իր նախորդներու՝ յատկապէս Սուրբ Յովհաննէս ԻԳ-ի նախաձեռնութիւնները, ինչպէս նաեւ Ֆրանկիսկոս Պապի խթանած միջեկեղեցական ճանապարհն ու միջկրօնական երկխօսութիւնը, որոնք սերմանուած են անձնական շփումներու եւ մարդկային հանդիպումներու միջոցով։
Այնուհետեւ Նորին Սրբութիւնը յիշեցուց, որ այս տարի կը նշուի Նիկիոյ Տիեզերական ժողովի 1700-ամեակը՝ բնորոշելով այն որպէս «հիմնարար հանգրուան բոլոր Եկեղեցիներու եւ եկեղեցական համայնքներու կողմէ ընդունուած Հաւատոյ հանգանակի ձեւաւորման ճանապարհին»։
Հայ Եկեղեցւոյ պատուիրակութիւնը օրուան ընթացքին այցելեցին Վատիկանի այգիներու մէջ տեղադրուած Ս. Գրիգոր Նարեկացիի եւ Ս. Պետրոսի տաճարի բակին մէջ բարձրացող՝ Ս. Գրիգոր Լուսաւորիչ հայրապետի արձանները։
Պատրիարք Հայրը, 20 Մայիս 2025, Երեքշաբթի գիշեր վերադարձաւ Աթոռ։
