Հայաստանեան, հետզհետէ համահայկական օրակարգը վերջերս ծանրաբեռնուած է Գարեգին Բ. Կաթողիկոսի դէմ կառավարութեան շրջանակներէն հնչող մեղադրանքներով։ Մայր Աթոռը քննադատութիւններուն դէմ հրապարակած է հաղորդագրութիւն մը, որ կը ներկայացնենք ստորեւ։ Ուշագրաւ է որ Կաթողիկոսը փոխանակ իրեն ուղղուած մեղադրանքներուն պատասխանելու, խնդիրը կը դիտէ եկեղեցին վսեմացնելու փորձ։
«Հայաստանի վարչապետը պետական այրին անհարիր բառապաշարով, վիրաւորանքներով եւ մեղադրանքներով հերթական արշաւի սկսած է ընդդէմ Հայաստանեայց Առաքելական Սուրբ Եկեղեցւոյ՝ օրենքէն վեր դասելով իր անձը։
Հայհոյախառն, անվայել խօսոյթներով հախուռն հրապարակումները զուրկ են բարեկրթութեան տարրական նորմերէն, կը ոտնահարեն մարդու հիմնարար իրաւունքները, կոպտօրէն կը վիրաւորէ հաւատացեալներու կրօնական զգացմունքները եւ կը սքողուէ կեղծ սրտացաւութեան հիմնաւորումներով։
Եկեղեցամարտ այս կեցուածքը ակնյայտօրէն թելադրուած է քաղաքական նպատակներով եւ փորձ է նսեմացնելու ազգային կեանքին եւ միջազգային շրջանակներուն յարգանք վայելող Հայոց Եկեղեցւոյ եւ եկեղեցականաց հեղինակութիւնը, լռեցնելու Եկեղեցւոյ ձայնը եւ նուազեցնելու անոր հանրային ազդեցութիւնը։ Կառաւարութեան ղեկավարի հակաեկեղեցական պահուածքը, ազգային արժէքներու եւ եկեղեցւոյ դէմ նախաձեռնած գործընթացները յղի են կործանարար հետեւանքներով եւ սպառնալիք՝ հայոց պետականութեան, մեր ժողովուրդի միաբանութեան թէ՛ հայրենիքին եւ թէ՛ սփիւռքի մէջ։ Այսպիսի գործողութիւնները կը պառակտեն հասարակութիւնը, կը տկարացնեն ազգի ոգին եւ հայրենանուիրումի բարձր գիտակցութիւնը յատկապէս առկայ մարտահրաւէրներու պայմաններուն։ Նման դատապարտելի ձեռնարկումները կը սպասարկեն արտաքին հայատեաց ուժերու նկրտումները՝ որոշակիօրէն կապակցելով ատրպէյճանական քարոզչամեքենայի կողմէ հայ ժողովրդին եւ Հայ Եկեղեցւոյ ուղղուած զրպարտութիւններու եւ կեղծ մեղադրանքներու հետ։
Հայոց Եկեղեցին, գիտակից իր յանձնառութիւններուն, անշեղօրէն կը շարունակէ հոգեփրկչական եւ ազգապահպան առաքելութիւնը՝ ընդդիմանալով ազգավնաս ու կործանարար ընթացքներուն եւ մշտապէս հետամուտ ըլլալով պետութեան ու ազգի գերակայ շահերուն, մեր սրբազան արժեքներու պաշտպանութեան։
Եկեղեցւոյ հարցերը կը լուծուին եկեղեցական կարգերու ու կանոններու համաձայն եւ դուրս են պետական եւ քաղաքական գործիչներու իրաւասութենէն։ Հայաստանեայց Առաքելական Սուրբ Եկեղեցին մէկ ամբողջութիւն է իր հաւատացեալ զաւակներով եւ զինուորագրեալ հոգեւորականներով՝ ի գլուխ ունենալով ազգընտիր Ամենայն Հայոց Հայրապետին։ Կոչ կ՚ուղղենք իրաւասու պետական մարմիններուն՝ կասեցնել վարչապետի այս անօրինական եւ անհեռատես քաղաքականութիւնը։ Հարկ չկայ Եկեղեցին ներքաշելու արհեստական օրակարգերու մէջ եւ մղելու հակադարձման գործողութիւններու։
Այս նոր փորձութեան յանդիման կը յորդորենք մեր Սուրբ Եկեղեցւոյ հաւատաւոր զաւակներուն ըլլալ միաբան ու միասնական, առ հայրենին եւ Սուրբ Եկեղեցին հաւատարմութեամբ ու զօրեղ հաւատքով յաղթահարել մեր ժողովուրդի առջեւ ծառացած բոլոր մարտահրաւէրները եւ երբեք թոյլ չտալ մեր ազգային հիմնասիւներու սասանումը: Թող այս մերժելի մեքենայութիւնները պատճառ չդառնան հիասթափութեան եւ գայթակղութեան։
Կ՚աղօթենք առ Փրկիչ մեր Տէր Յիսուս Քրիստոսին, որ վնասաբեր երեւոյթներով չխաթարուի հայրենական կեանքը, եւ աշխարհասփիւռ մեր ժողովուրդը ապրի խաղաղութեան, բարօրութեան եւ առաջընթացի մէջ։ Թող Տէրը անսասան պահէ հայոց պետականութիւնը եւ պայծառ՝ Հայաստանեայց Առաքելական մեր Սուրբ Եկեղեցին եւ Մայր Աթոռ Սուրբ Էջմիածինը հաւատաւոր իր բոլոր զաւակներով»։
