«Հայաստան չի հրաժարիր ճանապարհներու ապաշրջափակման սկզբունքէն։ Սա մեր օրակարգն է, եւ մենք առաջարկած ենք աշխարհին» ըսաւ վարչապետ Նիկոլ Փաշինեան Յուլիսի 16-ի ասուլիսին՝ խօսելով ճանապարհներու ապաշրջափակման ամերիկեան առաջարկի մասին։
Ան հաստատեց, որ Հայաստանը տարբեր առաջարկներ ստացած է եւ կը ստանայ։ Իրենք կը քննարկեն այդ առաջարկները Հայաստանի Հանրապետութեան տարածքային ամբողջականութեան, ինքնիշխանութեան, իրաւազօրութեան հիմքի վրայ։
Օրեր առաջ Թուրքիոյ ԱՄՆ դեսպան Թովմաս Պարրաք խօսելով տարածաշրջանային փոխադրութեան ենթակառուցուածքներու ապաշրջափակման մասին, ըսած էր թէ ԱՄՆ կրնայ վարձակալել Հայաստանի Հանրապետութեան ինքնիշխան տարածքի որոշ մէկ հատուածը, ուրկէ պէտք է անցնի «Զանգեզուրի միջանցքը»։
Այդ անհեթեթ առաջարկի պատասխանը եկած էր վարչապետի մամուլի խօսնակ Նազելի Պաղտասարեանի կողմէ։ Պաղտասարեան նշած էր որ Հայաստան տարածաշրջանային ենթակառուցուածքներու ապաշրջափակման հարցը կը քննարկէ բացառապէս ՀՀ ինքնիշխանութեան, տարածքային ամբողջականութեան եւ իրաւազօրութեան սահմանումին մէջ։ «Հայաստան չէ քննարկած եւ չի քննարկեր որեւէ երրորդ կողմի սեփական ինքնիշխան տարածքի նկատմամբ վերահսկողութիւնը արտապատուիրակելը»։
Յայտնի է որ ատրպէյճանաթրքական յամառ պահանջի կրկնօրինակը այդ անգամ ալ կու գայ Ամերիկա-Իսրայէլեան դաշինքի կողմէ։
Հայաստան պարտաւոր է դիմադրելու իր տարածքային ամբողջականութեան ուղղուած բոլոր սպառնալիքներուն։
