Իրանի խորհրդարանի ազգային ապահովութեան եւ արտաքին քաղաքականութեան յանձնաժողովի անդամ Իպրահիմ Ռեզայի «Էս.Էն.Էն.» ալիքէն կլոր սեղանի մը ընթացքին յայտնեց, որ Իրանի դիրքորոշումը յստակ է՝ Իրան որեւէ պարագայի պիտի չարտօնէ տարածաշրջանին մէջ իրավիճակի փոփոխութիւն, որովհետեւ Հայաստանի Սիւնիքի մարզի հնարաւոր կորուստը ուղղակի սպառնալիք մըն է Իրանի ազգային շահերուն։ Ան այս հաստատումը կատարեց՝ մեկնաբանելով Հայաստան-Իրան յարաբերութիւններու կարեւորութիւնը եւ մտահոգութիւն յայտնելով՝ այսպէս կոչուած «Զանգեզուրի միջանցք» ծրագիրին գծով։
«Հայաստան Իրանի ռազմավարական գործընկերն է։ Իրան մնայուն կերպով լաւագոյն յարաբերութիւններ ունեցած է Հայաստանի հետ՝ անկախ տեղւոյն իշխանութիւններէն։ Հայաստան Իրանը Եւրոպային կապող դարպասն է։ Եթէ իրականանայ այն, որ որոշ շրջանակներու մէջ շրջանառութեան մէջ դրուած է իբրեւ «Զանգեզուրի միջանցք»՝ մենք պիտի կորսնցնենք դրացի մը, եւ տարածաշրջանի աշխարհաքաղաքականութիւնը պիտի փոխուի, ինչ որ կը հակասէ մեր ազգային շահերուն։ Մենք պիտի չհանդուրժենք մեր շահերուն սպառնացող որեւէ բան։ Անկախ պայմաններէն՝ պիտի պաշտպանենք մեր շահերը», շեշտեց Ռեզայի, որ նաեւ, թէ Իրան եւ Հայաստանի ներկայ իշխանութիւնները այս հարցին վերաբերեալ նոյն դիրքորոշումը ունին։ «Այս պահուն Հայաստանի մէջ իշխող կառավարութիւնը որոշ թուլութիւններ ունի, եւ արդէն իսկ տեսանք, որ անոնք բաւարար կարողութիւն չունին այդ տարածքը պաշտպանելու։ Հայաստանի եւ մեր դիրքորոշումները մինչեւ այսօր նոյնն են, եւ որեւէ փոփոխութիւն չէ արձանագրուած։ Բազմաթիւ երկիրներ, նոյնիսկ Եւրոպայի որոշ պետութիւններ՝ ինչպէս Ֆրանսա, որոնց հետ մենք այլ բնագաւառներու մէջ հակասութիւններ ունինք, այս հարցին մէջ մեր կողքին են։ Սակայն կան կարգ մը բարդութիւններ. կան Ատրպէյճանին աջակցող գաղտնի հովանաւորներ։ Մենք այն, այս տարածաշրջանին եւ Կովկասի հարցերը տեղացիներուն եւ տարածաշրջանի երկիրներուն կողմէ լուծուիլը սկզբունքային կը համարենք։ Վերջին տարիներուն այլ ուժերու միջամտութիւնը միայն աւելի խորացուցած է ճգնաժամերը եւ արգելք եղած է անոնց լուծման։ Եթէ հարցը վստահուի Կովկասի երկիրներուն, ըստ ինծի, անիկա լուծելի է, եթէ ուրիշները չմիջամտեն եւ զէնք չմատակարարեն կարգ մը երկիրներու», եզրափակեց Ռեզայի։
