Ծանօթացանք դժբախտ օր մը, տխուր առիթով եւ հոգեմաշ միջավայրին։ Աթոռանիստ Մայր Եկեղեցւոյ բակն էինք։ Հոծ բազմութիւն մը լեցուցած էր եկեղեցւոյ բակը, մասնակցելու համար մեր ողբացեալ ընկեր, վաղամեռիկ փաստաբան Հաքան Պաքըրճըօղլուի յուղարկաւորութեան։
Այդ բազմութեան մէջ ինք էր որ մօտեցաւ ու ծանօթացուց զինք ըսելով «Ես Էրօլ Պաքըրճըօղլուն եմ, զարմիկը Հաքանին»։
Մեր միջեւ իսկոյն ծագեցաւ զրոյց, որու միջոցաւ վերահասու եղանք թէ ինք եւս կը պայքարէր քաղցկեղի դէմ։
Զուսպ էր եւ շատ չէր խօսած ըրածներուն մասին։ Այդ բոլորին տեղեկացանք հազիւ իր մահէն ետք, շնորհիւ զինք շրջապատած բարեկամներու գրառումներուն։ Այրին Սուլթանա Պաքըրճըօղլուն փափաքած էր այդ գրութիւնները մէկտեղել հատորի մը մէջ։
Էրոլ Պաքըրճըօղլուի անտիպ կամ զանազան պարբկաններու մէջ լոյս տեսած յօդուածները այժմ հաւաքուած են «Առանց պատրուակի կեանք մը» անուն հատորի մէջ։
Յառաջիկայ 11 Հոկտեմբեր շաբաթ յետմիջօրէին տեղի պիտի ունենայ յատուկ շնորհանդէս մը, Անարատ Յղութիւն շէնքի «Հաւաք» սրահին մէջ։ Ներկաներ այս առթիւ պիտի կարենան ունենալ նորատիպ գիրքէն օրինակներ։
