6Փետրուարին իրարայաջորդ երկու զօրաւոր երկրաշարժներ մեծ աւեր գործած էին պատմական Կիլիկիոյ շրջանի քաղաքներուն մէջ։ Այդ ցնցումներու հետեւանքով ըստ պաշտօնական տուեալներու զոհուած են աւելի քան 40 հազար քաղաքացիներ։ Հասարակական կազմակերպութիւններու եւ նոյնիսկ կարգ մը պետական գործիչներու համաձայն այդ թիւը կարելի է բարձրացնել եռապատիկ, քառապատիկ նոյնիսկ հնգապատիկ ձեւով։ Դարձեալ պաշտօնական աղբիւրներ վիրաւորեալներու թիւը կը ներկայացնէ 115 հազարի շուրջ։
Երբ Թուրքիա կը փորձէր մեծ աղէտի վէրքերը սփոփել, 20 Փետրուարի երեկոյեան, ժամը 20.04-ին նոր երկու երկրաշարժներ եւս հարուածեցին, այս անգամ Հաթայ նահանգի Դափնի (Տեֆնէ) եւ Սամանտաղ գաւառները։ Առաջինի ուժգնութիւնն էր 6,4, իսկ երկրորդինը 5,8։ Բարեբախտաբար այս երկրաշարժները մարդկային մեծ կորուստի պատճառ չդարձան տրուած ըլլալով որ ժողովուրդը արդէն փողոցներն էր կամ վրանների տակ։
Ներքին Գործոց Նախարարութիւնը յայտարարեց թէ այս նոր երկրաշարժի ընթացքին զոհուած են վեց քաղաքացիներ, որոնք իրենց ապրանքները դուրս բերելու համար մտած էին կիսափուլ բնակարաններ։
20 Փետրուարի երկրաշարժով բոլորովին գետնին հաւասարեցան բազմաթիւ շէնքեր, որոնք նախապէս վնասուած, բայց բոլորովին չէին փլած։ Հայաբնակ Վաքըֆգիւղի մէջ ալ բազմաթիւ բնակարաններ ծանր վնասներ ստացան։ Նոյնպէս գիւղի եկեղեցին, որ նախապէս թեթեւ վնասուածքներով յաջողած էր կանգուն մնալ, այս անգամ աւելի ծանր վիճակ կը պարզէ եւ լուրջ նորոգութեան կը կարօտի։
Գիւղի մէջ տեղի ունեցած աւերը հազիւ լուսաբացին աւելի պարզ դարձաւ, քանի որ երկրաշարժի հետ նոյն պահուն խզուեցաւ նաեւ ելեկտրական հոսանքը։ Միջոց մը առաջ Արեւելան Միջերկրականի Զարգացման Հիմնարկի օժանդակութեամբ կառուցուած հիւրանոցը եւս ծանրօրէն վնասուած է, որուն համար նորոգութեան փոխարէն կը ծրագրուի ամբողջովին վերակառուցել։
Երկրագիտութեան մասնագէտներ այս երկրորդը կը գնահատեն ոչ թէ յաջորդող ցնցումներ, այլ ուրոյն երկրաշարժ մը ըլլալով։ Նշենք որ 20 Փետրուարի երկրաշարժը զգալի եղած է նաեւ Սուրիոյ Հալէպ, Լաթակիա, Քէսապ եւ նոյնիսկ Լիբանանի Պէյրութ քաղաքը եւ Այնճար գաւառը։
