Նախ հասաւ հանրածանօթ քաղաքագէտ եւ պատմաբան փրոֆ. Մեթէ Թունճայի մահուան բօթը։ Ան իր կեանքը աւանդեց վերջին տարիներուն ապաստանած ծերանոցի մը մէջ։ Ծանօթ էր յատկապէս Թուրքիոյ բանուորական շարժումներու եւ ձախակողմեան կուսակցութիւններու պատմութեան նուիրուած իր ուսումնասիրութիւններով։ Խմբագրած ու հրատարակած էր նաեւ Անահիտ Տէր Մինասեանի «Հայ յեղափոխական կուսակցութիւններու պատմութիւն» անուն ուսումնասիրութիւնը։
Իր հետ մեր անձնական ծանօթութիւնը կայացաւ Վաքըֆգիւղի Հայրենակցական Միութեան երդիքին տակ, Հայր Լեւոն Զէքիեանի հետ հանդիպումի մը առթիւ։
Յաջորդ օր՝ 19 Օգոստոսին այս անգամ վերահասու եղանք բազմավաստակ լրագրող եւ լուսանկարիչ Կարպիս Էօզաթայի մահուան։
Ան երկար տարիներ ծառայած էր թրքական մամուլին, յատկապէս «Հիւրրիյէթ» թերթի միջոցաւ։ 79-ամեայ Կարպիս Էօզաթայ իր գործունէութեան ընթացքին նուաճեց լրագրական լուսանկարչութեան յատուկ մրցանակներ։ Իր կարեւորագոյն գործը կը համարուի Յորդանանի թագաւոր Հիւսէյինի հօր՝ Թալլալ արքայի առաջին եւ վերջին լուսանկարի ձեռքբերումը։ Այդ նկարը ապահովելու համար Կարպիս Էօզաթայ մտաւ արքայի դարմանում տեսած հիւանդանոցի պարտիզպանի կերպարին։ Ի վերջոյ այդ նկարահանման համար ալ ցկեանս արգիլուեցաւ Յորդանան մուտք գործելէ։
