Երբ երկրի ներքին քաղաքականութիւնը զբաղած է «Ահաբեկչութենէ զերծ Թուրքիա» կոչումով ծանօթ հաշտութեան գործընթացին, երբ այդ առումով կազմուած յանձնախումբը յաճախակի ժողովներ կ՚ունենայ զանազան կառոյցներու կամ կազմակերպութիւններու հետ, անդին ընդդիմադիր գլխաւոր կուսակցութեան հանդէպ հալածանքը նոյն թափով կը շարունակուի։
Այսպէս 2 Սեպտեմբերին կայացող դատական վճիռով մը չեղեալ համարուեցաւ Ժողովուրդահանրապետական կուսակցութեան 2024-ին գումարուած իսթանպուլեան համագումարը։
Դատարանը հիմնուելով կարգ մը կուսակցականներու ամբաստանութեան, համոզում կայացուց թէ կուսակցութեան Իսթանպուլի վարչութեան ընտրութեան մէջ կաշառքներ ու խոստումներ տրուած են կարգ մը պատգամաւորներու։
Այս պնդումը հաւաստի չէ, քանի որ կը բացակայի կաշառք տուողներու եւ առնողներու անունները։ Սակայն այդ պնդումը իսկ բաւարար եղած է, որ չեղարկուի համագումարը եւ հոն կայացած ընտրութիւնները։ Աւելին՝ դատարանը Կուսակցութեան Իսթանպուլի մասնաճիւղին համար տեղապահ նշանակած է երկու շրջան առաջ այդ աթոռը զբաղեցնող Կիւրսել Թեքինը։ Իսկ Թեքին արդէն իսկ հրաժարած էր կուսակցութեան անդամութենէ։
Այս զարգացումներու դէմ կուսակցապետ Էօզկիւր Էօզել իր ընդվզումը յայտնեց խօսքը ուղղելով նախագահ Էրտողանին։ «Եթէ կը վախնաս նախագահի թեկնածու Էքրեմ Իմամօղլուէ, թող ան ետ քաշէ նախագահական իր թեկնածութիւնը։ Ես ալ պատրաստ եմ կուսակցապետի իմ աթոռը լքելու, պայմանաւ որ շուտափոյթ կազմակերպես կանխահաս ընտրութիւնները»։
Յայտնի է որ կուսակցապետը իր այս ելոյթով ասպարէզ կը կարդայ նախագահ Էրտողանի դէմ հաշուի ունենալով թէ բոլոր կանխատեսումները կը վկայեն Էրտողանի իշխանութեան անկումը։
